Tehranda Anım Günü ilə əlaqədar mərasim keçirilib
Tehran, 28 sentyabr, AZƏRTAC
Sentyabrın 27-də Azərbaycanın İrandakı səfirliyində Anım Günü ilə əlaqədar mərasim keçirilib.
AZƏRTAC xəbər verir ki, mərasimdə İran XİN-in məsul işçiləri, İqtisadi Əməkdaşlıq Təşkilatı (İƏT) Baş katibinin müavini və təşkilatın katibliyinin əməkdaşları, İranın Azərbaycandakı keçmiş səfiri Möhsün Pak Ayin, qardaş Türkiyənin və Pakistanın Tehrandakı səfirliyinin əməkdaşları, Tehran ictimaiyyətinin nümayəndələri, ziyalılar və Tehranda yaşayan azərbaycanlılar iştirak ediblər.
Anım Günü münasibətilə səfirliyin həyətində 44 günlük Vətən müharibəsi zamanı torpaqlarımızın azadlığı uğrunda həlak olan şəhidlərimizin qəhrəmanlığı və şücaətini, erməni qəsbkarlarının işğal etdiyi rayonlarımızda törətdikləri dağıntıları, hərbi cinayətləri əks etdirən “Unutmadıq” mövzusunda fotosərgi təşkil olunub. Səfirliyin binasından və əməkdaşların yaşadıqları mənzillərin eyvanından Azərbaycan bayraqları asılıb. Fotosərgidə Ermənistanın növbəti hərbi təxribatının qarşısını almaq və mülki əhalinin təhlükəsizliyini təmin etmək məqsədilə Azərbaycan Respublikası Silahlı Qüvvələrinin özünümüdafiə hüququ çərçivəsində keçirdiyi uğurlu hərbi əməliyyatlardan fotolar da nümayiş edilib.
Sərgiyə baxış keçirildikdən sonra şəhidlərimizin əziz xatirəsi bir dəqiqəlik sükutla yad edilib, Qurandan ayələr oxunub.
Tədbiri açan Azərbaycan Respublikası Silahlı Qüvvələrinin İrandakı hərbi attaşesi, polkovnik Elvin Qasımov qeyd edib ki, Azərbaycan Ordusu 44 günlük Vətən müharibəsində Ermənistanın növbəti hərbi təxribatının qarşısını almaq və mülki əhalinin təhlükəsizliyinin təmini məqsədilə özünümüdafiə hüququ çərçivəsində keçirdiyi uğurlu hərbi əməliyyatlarla ərazilərimizi işğaldan azad edib. Ermənistanın silahlı birləşmələri 93 nəfər mülki şəxsi, o cümlədən 12 uşaq və 27 qadını qətlə yetiriblər. Hərbi əməliyyatlar zamanı Azərbaycan Ordusunun 2907 hərbi qulluqçusu şəhid olub, 7 hərbi qulluqçu isə itkin düşüb.
Polkovnik E.Qasımov vurğulayıb ki, qalib Azərbaycan xalqının və onun müzəffər Silahlı Qüvvələrinin mənsubu olmaqdan böyük qürur hissi keçiririk.
İranın Azərbaycandakı keçmiş səfiri Möhsün Pak Ayin çıxış edərək bildirib ki, Azərbaycan hər zaman öz torpaqlarının azadlığı uğrunda mübarizə aparıb və nəticədə buna nail olub. Qonşu və dost Azərbaycanın öz ərazilərini işğaldan azad etməsi bizi sevindirir. İran Azərbaycanın ərazi bütövlüyünü və suverenliyini hər zaman dəstəkləyib və bundan sonra da dəstəkləyəcək. Səfir qeyd edib ki, Azərbaycanda səfir işlədiyi müddətdə Qarabağın azad olunmasını arzulayıb.
Keçmiş səfir İranın yeni seçilən Prezidenti İbrahim Rəisinin qonşularla münasibətlərə xüsusi diqqət yetirdiyini bildirib. M.Pak Ayin Azərbaycanın azadlığı uğrunda şəhid olanların xatirəsini hər zaman əziz tutacaqlarını vurğulayıb.
İqtisadi Əməkdaşlıq Təşkilatının baş katibinin müavini Hüseyn Avni Bıçaqlı çıxış edərək diqqətə çatdırıb ki, Azərbaycan öz ərazilərini işğaldan azad etməklə bütün regionda sülhün və əmin-amanlığın qorunmasında maraqlı olduğunu göstərib. Azərbaycan regionda təhlükəsizliyin təmin olunmasına böyük töhfə verib. İşğaldan azad edilən rayonlarda həyata keçirilən quruculuq işləri, “ağıllı kənd”, “ağıllı şəhər” kimi layihələrin reallaşdırılması onu deməyə əsas verir ki, Azərbaycanın məqsədi regionda sabitliyi təmin etməkdir. İƏT baş katibinin müavini torpaqlarının azad edilməsi münasibətilə Azərbaycan Respublikasına təbriklərini çatdıraraq şəhidlərin hörmətlə yad olunduğunu bildirib.
Sonra tədbir iştirakçıları 44 günlük Vətən müharibəsindən bəhs edən sənədli filmə baxıblar.
Səfirlik tərəfindən təşkil olunmuş “Unutmadıq” adlı fotosərgi və anım tədbirinə qatıldıqlarına görə iştirakçılara təşəkkür edən Azərbaycanın İrandakı səfiri Əli Əlizadə Vətən müharibəsi şəhidlərinin erməni təcavüzünün qarşısını almaqla 30 ilə yaxın davam etmiş işğala son qoymaq və Azərbaycanın ərazi bütövlüyünün bərpasını təmin etmək uğrunda canlarını fəda etdiklərini bildiriblər. Səfir Azərbaycanın sülh yolu ilə münaqişəni həll etmək çağırışlarına məhəl qoymayan Ermənistanın 30 il ərzində müharibə və insanlığa qarşı cinayətlərini davam etdirdiyini, işğal altında qalan bütün şəhər və kəndləri, mədəni və dini abidələri viran qoyaraq yerlə yeksan etdiyini vurğulayıb. Həmin ərazilərdə mövcud olan 67 məsciddən 65-nin ermənilər tərəfindən tam dağıdıldığını, qalan 2 məscidinin isə heyvan saxlanması üçün istifadə etdiklərini bildirən Əli Əlizadə, bunun tək Azərbaycan üçün deyil, bütün müsəlman və İslam aləmi üçün təhqir olduğunu diqqətə çatdırıb.
Səfir bütün bu erməni vəhişiliklərinə şəhidlərimizin qəhrəmanlığı, canı və qanı bahasına, eləcə də Müzəffər Ali Baş Komandan İlham Əliyevin rəhbərliyi ilə ordumuzun şücaəti və əzmi sayəsində son qoyulduğunu, şəhidlərimizin qanının yerdə qalmadığını və Azərbaycan torpaqlarının işğaldan azad edildiyini bildirib. Şəhid ailələrinə dövlətimiz və xalqımız tərəfindən daim diqqət və qayğı göstərildiyini qeyd edən səfir, şəhidlərimizin ölmədiyini, Azərbaycan xalqının qəlbində əbədi yaşadığını və Prezident İlham Əliyevin Sərəncamı ilə təsis olunmuş Anım Gününün buna bariz nümunə olduğunu ifadə edib.
Diplomat 30 ilə yaxın davam edən münaqişə dövründə dost və qonşu ölkə olan İran İslam Respublikasının da Azərbaycanın ərazi bütövlüyünü daim dəstəklədiyinə görə təşəkkür edərək, İranla sərhəddə olan 132 kilometr Azərbaycan ərazilərinin də işğaldan azad edildiyini və Azərbaycan Prezidentinin həmin ərazini dost və əməkdaşlıq sərhədi adlandıraraq İranla əlaqələrdə yeni imkanlar açdığını bildirdiyini xatırladıb. Əli Əlizadə bu sərhəd ərazilərində İran ilə əlaqələrin daha da güclənməsinə öz töhfəsini verəcəyinə inandığını və bu istiqamətdə Azərbaycanın əməkdaşlığa hər zaman hazır olduğunu vurğulayıb.
Tədbirdən sonra iştirakçılar səfirliyin xatirə dəftərinə ürək sözlərini yazıblar.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
