Tehranda karantin rejiminin şərtləri yumşaldılıb
Tehran, 12 aprel, AZƏRTAC
Son 24 saat ərzində İranda koronavirusdan 177 nəfər həyatını itirib, 1627 nəfər isə karantinə alınıb.
AZƏRTAC xəbər verir ki, bu sözləri İranın Səhiyyə Nazirliyinin mətbuat katibi Kiyanuş Cahanpur bildirib.
Bununla da İranda virusa yoluxanların sayı 71 min 686, ölənlərin sayı isə 4 min 474 nəfərə çatıb.
Koronavirusla mübarizə üçün yaradılmış milli komitədə çıxış edən Prezident Həsən Ruhani bildirib ki, İranda virusa yoluxanların 2 faizi dünyalarını dəyişib. Lakin Avropa ölkələrində bu rəqəm 22 faiz təşkil edir. Onun sözlərinə görə, sanksiyalar İrana virusla mübarizə aparmaq üçün əngəllər törətsə də xalqın birliyi və həkimlərin fədakarlığı daha böyük fəlakətin qarşısını alıb.
Prezident qeyd edib ki, Tehranda karantin şərtləri yumşaldılıb. Bəzi müəssisələrin işə başlamasına və metro istisna olmaqla şəhər daxili ictimai nəqliyyatın hərəkətinə icazə verilib. Lakin vətəndaşlar diqqətli olaraq sosial məsafəni gözləməli və tibbi maskasız bayıra çıxmamalıdırlar. Bununla yanaşı, Tehranda dezinfeksiya işləri davam edir.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
