TEHRANDA XƏZƏR DƏNİZİNİN SU BİORESURSLARI KOMİSSİYASININ 31–Cİ İCLASI KEÇİRİLMİŞDİR
Bakı, 25 iyun (AZƏRTAC). Tehranda Xəzər dənizinin Su Bioresursları Komissiyasının 31-ci iclası keçirilmişdir. İclasda Azərbaycan Respublikasını Ekologiya və Təbii Sərvətlər Nazirliyinin Su Hövzələrində Bioloji Resursların Artırılması və Mühafizəsi Departamentinin mütəxəssislərindən ibarət nümayəndə heyəti təmsil etmişdir. İclasda 6 məsələ gündəliyə salınmış və müzakirə olunmuşdur.
Nazirlikdən AZƏRTAC-a verilən məlumata görə, iclasda Xəzərətrafı ölkələrin 2010-cu il üçün nəzərdə tutulmuş balıq ovu kvotasının mənimsənilməsi, su bioresurslarının artırılması və mühafizəsi haqqında, balıq ehtiyatlarının öyrənilməsi üzrə 2010-cu ildə aparılmış elmi tədqiqat işləri barədə hesabatlar dinlənilmiş və qəbul olunmuşdur.
İclas iştirakçıları 2010-cu il üçün balıq ovunun ümumi həddi və onun milli kvotalara bölünməsi məsələlərini müzakirə etmiş və 2008-ci ilə nisbətən (2009-cu ildə balıq ovu kvotası qəbul edilməmişdir) kvotanın ümumi həddi 7 faiz aşağı salınmaqla, Azərbaycan üzrə 6,7 faiz qəbul edilmişdir.
İclasda Azərbaycan Respublikasının nümayəndə heyəti bölgə balığının sənaye ovundan birtərəfli imtina etdiyi və onun ehtiyatlarından yalnız balıqartırma və elmi tədqiqat məqsədləri üçün istifadə edəcəyi barədə xüsusi bəyanatla çıxış edərək, digər ölkələri də bu təklifə qoşulmağa çağırmışdır.
Qazaxıstan Respublikasının Xəzərdə nərəcinsli balıqların ovuna ümumi qadağa (moratoriya) qoyulması təklifi müzakirə edilmişdir. İran və Türkmənistan bu məsələnin ətraflı öyrənilməsini və hüquqi mexanizminin işlənilməsindən sonra baxılmasını təklif etmiş, Rusiya Federasiyası isə balıqartırma və elmi məqsədlər üçün istifadə şərtilə ovu saxlamağa razılığını bildirmişdir.
Qeyd edək ki, CİTES Konvensiyasının Tərəflərinin 14-cü konfransında 12.7 qətnaməsinə edilən dəyişiklik və əlavələrə əsasən hər hansı ölkə birtərəfli qaydada balıq ovuna qadağa qoya bilər. Azərbaycan Respublikası öz növbəsində çıxışında bu qətnamədən istifadə edərək, 4 növ nərə balığından ikisinin (kələmo (şip) balığına 1979-cu ildə, bölgə balığına isə 2009-cu ildə) ovuna birtərəfli qaydada qadağa qoyduğunu bəyan etmişdir. Qazaxıstan Respublikasına isə Azərbaycan tərəfinin nümunəsindən istifadə edərək, ehtiyatları kəskin azalan növlərin ovundan birtərəfli qaydada imtina etməyi və ya ümumi ovun azalması təklifinə baxmağı təklif etmişdir.
İclasda həmçinin BMT-nin Ərzaq Təşkilatının (FAO) Xəzərdə balıqçılıq təsərrüfatının idarə edilməsi üzrə apardığı layihənin müddətinin uzadılması barədə İran İslam Respublikasının təklifi müzakirə edilərək qəbul edilmişdir. Bu məqsədlə azı 3 Xəzərətrafı dövlətin Kənd Təsərrüfatı Nazirlərinin FAO təşkilatına müraciətinin vacibliyi bildirilmişdir.
Azərbaycan nümayəndə heyətinin təklifi ilə 2011-ci il üçün balıq ovu kvotasının qəbul edilməsinə həsr olunmuş növbəti 32-ci iclasın İran İslam Respublikasında dekabr ayının birinci ongünlüyündən gec olmayaraq keçirilməsi qəbul edilmişdir.
Bölmənin digər xəbərləri
