SİYASƏT
TƏLƏBƏLƏR VƏRƏQƏLƏR YAYMIŞLAR
Strasburqda təhsil alan azərbaycanlı tələbələr Sovet ordusunun 366-cı alayının bilavasitə köməyi sayəsində erməni silahlı qüvvələrinin Xocalı şəhərində törətdikləri vəhşiliklər haqqında “Xocalı faciəsi. XX əsr tarixinin qara səhifələrindən biri” başlığı altında vərəqələr hazırlamış, universitetlərin müəllim və tələbələri arasında yaymışlar.
Faktiki materiallara əsaslanmış yazıda ermənilərin dinc əhaliyə qarşı törətdikləri cinayətkar hərəkətlər açıqlanmışdır. Vərəqələrdə Xocalı faciəsi ilə bağlı “Mond” qəzetinin 1992-ci il 14 mart tarixli nömrəsində dərc olunmuş məqalədən bir hissə nümunə gətirilmişdir: “Müxtəlif dərəcədə güllə yarası almış və mühasirədən zorla xilas olmuş başı açıq və ayağı yalın uşaq və qadınların görkəmi, barmaqları, başları kəsilmiş halda, yolboyu düşüb qalmış insan cəsədləri Ağdamdakı xarici müxbirləri dəhşətə gətirmişdi”.
Tələbələr müxtəlif etnik qrupların yaşadığı Yuqoslaviyada milli qırğın törətmiş Miloşeviçin məhkəmə məsuliyyətinə cəlb edildiyi kimi, Xocalı soyqırımı törətmiş ermənilərin hərəkətlərinə də dünya ictimaiyyətinin nə vaxtsa qiymət verəcəyinə ümid etdiklərini vərəqələrdə xüsusi vurğulamışlar.
Həmin gün tələbələr Strasburqdakı Azərbaycan nümayəndəliyi qarşısına toplaşmış Xocalı hadisələri zamanı həlak olanların xatirəsini bir dəqiqəlik sükutla yad etmişlər.
Əsgər Əliyev
AZƏRTAC-ın xüsusi müxbiri
PARİS