Tələbələrə arxeoloji turizmlə bağlı geniş məlumatlar verilmişdir
Bakı, 25 oktyabr (AZƏRTAC). Oktyabrın 24-də Azərbaycan Dövlət Mədəniyyət və İncəsənət Universitetinin kulturologiya fakültəsində “Miras” Mədəni İrsin Öyrənilməsinə Kömək İctimai Birliyi (İB) “Azərbaycanda arxeoloji turizmin inkişaf etdirilməsi və təbliği” layihəsi çərçivəsində seminar keçirmişdir.
İB-dən AZƏRTAC-a bildirmişlər ki, layihə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən maliyyələşdirilmişdir.
Tədbirdə birliyin fəaliyyəti haqqında iştirakçılara ətraflı məlumat verilmiş və diqqətə çatdırılmışdır ki, son vaxtlar qurum tərəfindən bir çox mühüm layihələrə imza atılmışdır.
Vurğulanmışdır ki, seminarın məqsədi Azərbaycanda arxeoloji turizmi təbliğ edərək bu sahənin inkişafına nail olmaq, tarixi-arxeoloji abidələrimizə diqqəti artırmaq, onların qorunmasını təmin etmək, arxeologiya elminə marağı genişləndirməkdən ibarətdir.
Seminarda “Miras” İB-nin sədri, tarix üzrə fəlsəfə doktoru Fariz Xəlilli “Arxeoloji mirası qorumaq və təbliğ etmək üçün onu sevmək və sevdirmək lazımdır” mövzusunda məruzə ilə çıxış etmişdir.
Məruzəçi qeyd etmişdir ki, Azərbaycanın bir sıra bölgələrində nadir arxeoloji abidələr var və onların qorunub təbliğ olunması zəruridir.
Tarix elmləri doktoru, professor, Ağsu arxeoloji ekspedisiyasının rəisi Qafar Cəbiyevin məruzəsində isə seminar iştirakçılarına müstəqillik illərində Azərbaycanda arxeoloji abidələrin tədqiqi sahəsində əldə edilən uğurlar haqqında məlumat verilmişdir.
Seminarda “Azərbaycanda arxeoloji turizmin inkişaf etdirilməsi və təbliği” layihəsi çərçivəsində çəkilmiş “Azərbaycan abidələr diyarıdır” filmi nümayiş olunmuşdur.
Sonda “Miras” İB-nin təmsilçiləri tələbələrin suallarını cavablandırmışlar.
Bölmənin digər xəbərləri
