“Təmiz Qala” layihəsi çərçivəsində ekoloji tədbirlər davam etdirilir
Bakı, 5 oktyabr (AZƏRTAC). Heydər Əliyev Fondunun təşəbbüsü ilə “Təmiz şəhər” Açıq Səhmdar Cəmiyyəti (ASC) tərəfindən həyata keçirilən “Təmiz Qala” layihəsi çərçivəsində maarifləndirmə tədbirləri davam etdirilir.
“Təmiz şəhər” ASC-nin mətbuat xidmətindən AZƏRTAC-a verilən məlumata görə, layihə çərçivəsində indiyədək qəsəbədəki uşaq bağçasında ekoloji yarışlar və oyunlar təşkil edilmiş, məktəblərdə maarifləndirici söhbətlər aparılmış, sakinlərlə evlərdə görüşlər keçirilmiş, əhaliyə ekoloji mövzularda müxtəlif izahedici və təşviqat materialları paylanmışdır.
Bu dəfə isə qəsəbədə yerləşən iki orta məktəbdən 60-a yaxın şagirdin iştirakı ilə tullantıların idarəedilməsi ilə bağlı “breyn rinq” formatlı oyun keçirilmişdir. Şagirdlər bir neçə komandaya bölünərək suallara cavab vermiş, fikir mübadiləsi aparmışlar. Ekoloji-intellektual oyunun bütün iştirakçılarına “Təmiz Şəhər” ASC tərəfindən xatirə hədiyyələri verilmiş, qaliblər diplomlarla mükafatlandırılmışlar.
Bu tədbirlərin keçirilməsində məqsəd Qala qəsəbəsi ərazisində tullantılarının yığılması, daşınması, çeşidlənməsində müasir idarəetmə sistemini yaratmaq və bu prosesləri dünya standartlarına uyğun təşkil etməkdir.
Bölmənin digər xəbərləri
