“TƏMİZ ŞƏHƏR” ASC MƏKTƏBLİLƏR ÜÇÜN YAY MƏKTƏBİ KEÇİRƏCƏKDİR
Bakı, 16 iyul (AZƏRTAC). 2010-cu il “Ekologiya ili” çərçivəsində “Təmiz Şəhər” Açıq Səhmdar Cəmiyyəti (ASC) iyulun 26-dan 31-dək məktəblilər üçün “Təmiz şəhər naminə” adlı yay məktəbi təşkil edəcəkdir.
Tədbirin məqsədi yeniyetmələrin diqqətinin ətraf mühitin mühafizəsinə cəlb edilməsi və ekoloji maarifləndirilməsi, tullantıların düzgün idarə edilməsi, ekologiya sahəsində bilik və dünya görüşlərini genişləndirmək və ictimai müzakirələrin keçirilməsidir.
Yay məktəbində Bakı şəhər orta məktəblərinin 14-17 yaşlı şagirdləri iştirak edə bilərlər. “Vətəndaş Cəmiyyətində Debat” İctimai Birliyinin dəstəyi ilə Quba şəhərinin Qəçrəş kəndində yerləşən istirahət mərkəzlərinin birində reallaşacaq layihədə ümumilikdə 60 nəfər iştirak edəcəkdir.
Tədris proqramının sonunda iştirakçılar arasında tullantıların idarə edilməsi və ətraf mühitin mühafizəsi mövzusunda debat yarışları keçiriləcəkdir. Debat turnirində 16 paytaxt məktəbinin komandasının iştirakı nəzərdə tutulmuşdur.
İştirakçılar diplomlarla təltif olunacaq, qaliblərə isə hədiyyələr veriləcəkdir.
Qeyd edək ki, yay məktəbində iştirak ödənişsizdir və nəqliyyat, qida, yaşayış, təlim-tədris və asudə vaxtın təşkili xərcləri “Təmiz Şəhər” ASC tərəfindən qarşılanacaqdır.
Bölmənin digər xəbərləri
