Tərtərdə Gənclər Günü münasibətilə tədbir - “Heydər Əliyev və Azərbaycan gəncliyi”
Tərtər, 28 yanvar, AZƏRTAC
Yeni Azərbaycan Partiyası (YAP) Tərtər rayon təşkilatında 2 Fevral - Azərbaycan Gəncləri Günü münasibətilə “Heydər Əliyev və Azərbaycan gəncliyi” mövzusunda tədbir keçirilib.
AZƏRTAC-ın bölgə müxbiri xəbər verir ki, əvvəlcə Ulu Öndər Heydər Əliyevin və ölkəmizin ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.
Gənclər Gününün əhəmiyyətindən danışan YAP Tərtər rayon təşkilatının sədri Eldar Əsədov bildirib ki, bu əlamətdar gün gənclərə həmişə böyük diqqət və qayğı ilə yanaşan, onların problemlərinin həlli istiqamətində həyata keçirilən tədbirlərə xüsusi önəm verən, bu siyasəti müasir müstəqil Azərbaycan dövlətinin fəaliyyətinin ən mühüm istiqamətlərindən biri kimi dəyərləndirən Ümummilli Lider Heydər Əliyevin adı ilə bağlıdır. Ulu Öndərin 1997-ci ildə imzaladığı müvafiq Fərmana əsasən, fevralın 2-si Azərbaycan Gəncləri Günü elan edilib.
Diqqətə çatdırılıb ki, Azərbaycanda həyata keçirilən gənclər siyasəti gənc nəslin hərtərəfli inkişafı üçün şərait yaratmaqla yanaşı, onları vətənpərvər ruhda formalaşdırıb. Azərbaycan gəncləri üçün ən həlledici sınaqlardan biri 2020-ci ilin sentyabrın 27-də başlayan və noyabrın 10-dək davam edən Vətən müharibəsi oldu. Rəşadətli Azərbaycan Ordusunun sıralarında Vətən uğrunda mətanətlə vuruşan qəhrəman gənclərimiz adlarını xalqımızın ən yeni tarixinə qızıl hərflərlə yazdılar. Məhz onların rəşadəti sayəsində əldə olunan bu şanlı Zəfər ilə Azərbaycan ərazi bütövlüyünü bərpa etdi, xalqımız otuz illik həsrətdən sonra tarixi torpaqlarımıza qovuşdu.
Gənclərimiz Vətən uğrunda döyüşlərlə yanaşı, arxa cəbhədə də yüksək fəallıq göstərib, ölkəmizlə bağlı həqiqətlərin, işğalçı Ermənistanın əzəli torpaqlarımızda törətdiyi vandallıq aktlarının beynəlxalq ictimaiyyətin diqqətinə çatdırılmasında fəal iştirak ediblər. Gənclər siyasəti ilə bağlı görülən işlər bir daha onu deməyə əsas verir ki, ölkəmizdə vətənpərvər, milli-mənəvi dəyərlərə, Heydər Əliyev ideyalarına sadiq gənclik formalaşıb. Bu isə gələcək inkişafımızın möhkəm əllərdə olacağına böyük əminlik yaradır.
Tədbirdə Tərtər Rayon İcra Hakimiyyətinin əməkdaşı Rəqsanə Məmmədli, Suvarma Sistemləri İdarəsinin əməkdaşı, fəal gənc Əqdəm Əlişzadə, Heydər Əliyev Mərkəzinin əməkdaşı Samirə Səfərova, Tərtər şəhər 1 nömrəli tam orta məktəbin müəllimi Nərgiz Dostuzadə və başqaları çıxışlarında Prezident İlham Əliyevin gənclərə göstərdiyi diqqət və qayğıdan bəhs ediblər. Gənclərin Prezident İlham Əliyevin ətrafında sıx birləşdikləri, ölkədə həyata keçirilən daxili və xarici siyasəti birmənalı şəkildə dəstəklədikləri diqqətə çatdırılıb.
Sonra rayonun ictimai-siyasi həyatında fəal iştirak edən bir qrup YAP fəalına təşəkkürnamələr təqdim edilib.
Bölmənin digər xəbərləri
