Teymur Rzayev: Ümummilli Lider xalqımıza göstərdiyi misilsiz xidmətləri ilə hələ sağlığında əfsanəyə çevrilib
İstanbul, 4 noyabr, AZƏRTAC
Müasir müstəqil Azərbaycan dövlətinin qurucusu və memarı, bütün varlığı ilə Vətəninə, xalqına bağlı olan, dünyaşöhrətli siyasətçi və böyük dövlət xadimi ümummilli lider Heydər Əliyev çağdaş tariximizlə əbədiləşən əvəzsiz şəxsiyyətdir. Ulu Öndər respublikamıza rəhbərliyinin bütün dövrlərində Vətən və xalq qarşısında misilsiz xidmətlər, xilaskarlıq missiyası, zəngin dövlətçilik irsi nümunəsi göstərib. Azərbaycan tarixində özünəməxsus yer tutan nadir şəxsiyyətlərdən olan ümummilli lider Heydər Əliyev xalqımızın müstəqillik mübarizəsindəki misilsiz xidmətləri ilə hələ sağlığında əfsanəyə çevrilib, bütün dünya azərbaycanlılarının sonsuz sevgisini qazanıb.
Ulu Öndərin ölkəmizdə hər bir sahədə olduğu kimi, incəsənət sahəsində də əvəzsiz xidmətləri olub. Ümummilli Liderin təşəbbüsü ilə 1982-ci ildə Azərbaycan Dövlət İncəsənət İnstitutunun nəzdində altıillik akademik tədris proqramı üzrə rəngkarlıq, heykəltəraşlıq, qrafika və sənət tarixi şöbələri qurulub. Bu şöbələrə ilk tələbələr də həmin il qəbul edilib. Rəngkarlıq şöbəsinə ilk sənəd verən tələbə də məhz mən olmuşam.
Bu fikirləri ulu öndər Heydər Əliyevlə bağlı xatirələrini AZƏRTAC-la bölüşən Azərbaycan Respublikasının Əməkdar rəssamı, İstanbulun Yeditəpə Universitetinin professoru Teymur Rzayev bildirib.
Ulu öndər Heydər Əliyev tərəfindən Azərbaycan Dövlət Rəssamlıq Akademiyasının yaradılması ilə bağlı Xalq rəssamı Tahir Salahovun xatirələrini xatırladan rəssam deyib: “Dünya şöhrətli rəssam Tahir Salahovla mütəmadi olaraq Bakıda, Moskvada görüşür, bəzən də telefonla danışırdım. Hər görüşümüzdə çox dəyərli xatirələrini yada salırdı. Belə görüşlərimizdən biri də 2018-ci ildə Bakıda baş tutdu. Yanımda gənc heykəltəraşlarımız da var idi. Həmin görüşdə Tahir Salahov çox önəmli bir tarixi hadisəni bizlərə danışaraq dedi. “1980-cı ildə Tiflisdə SSRİ Rəssamlıq Akademiyasının üzvlərinin böyük bir toplantısı keçirilirdi. Ulu öndər Heydər Əliyev də bu toplantıya dəvətli idi. Yüksək səviyyədə keçən tədbirdən sonra Heydər Əliyev mənimlə görüşərək çox səmimi söhbət etdi. Söhbət əsnasında Ulu Öndər məndən nə üçün Azərbaycanda Rəssamlıq Akademiyasının olmadığını soruşdu. Mən də öz növbəmdə dedim ki, Azərbaycanda Rəssamlıq Akademiyasının qurulması üçün SSRİ Rəssamlıq Akademiyasının icazəsi olmalıdır. O da SSRİ kadrlar planlamasına görə akademiyanın qurulması deyil, sadəcə, Əzim Əzimzadə adına Rəssamlıq Məktəbindən yüksək nailiyyətlə məzun olanlar Moskvadakı, Sankt-Peterburqdakı (Leninqrad) və bir neçə başqa vilayətlərdəki rəssamlıq institutlarına kiçik bir kvota ilə göndərilə bilər. Bu səbəbdən də Moskvadakı akademiyanın kadr siyasətinə görə Azərbaycanda Rəssamlıq Akademiyasının yaradılmasına icazə verilməlidir ki, bu da çox çətin məsələdir”. Tahir Salahovun bu sözlərindən sonra Ulu Öndər “O zaman biz Azərbaycan Rəssamlıq Akademiyasını İncəsənət İnstitutunun nəzdində açaq”,- deyə bildirir.
Bundan sonra 1982-ci ildə Azərbaycan Dövlət İncəsənət İnstitutunun nəzdində altıillik akademik tədris proqramı üzrə rəngkarlıq, heykəltəraşlıq, qrafika və sənət tarixi şöbələri quruldu. Bu şöbələrə ilk tələbələr də həmin il qəbul edildi. Rəngkarlıq şöbəsinə ilk sənəd verən tələbə də məhz mən olmuşam və bu təhsilimi qırmızı diplomla bitirmişəm. Hətta daxil olmağımla bağlı ilk qəbzi almaq üçün hamıdan əvvəl getmişdim ora. Çətinliklə də olsa, həmin qəbzi ala bildim. Hazırda həmin qəbz mənim şəxsi arxivimdədir”.
2000-ci il iyulun 13-də Azərbaycan Prezidenti Heydər Əliyevin Sərəncamı ilə Azərbaycan Rəssamlıq Akademiyasının yaradıldığını xatırladan Teymur Rzayev bildirib ki, bununla da ulu öndər Heydər Əliyev Azərbaycan mədəniyyətini, sənətini dünyaya tanıdacaq milli ruhlu sənətkarların yetişməsində pay sahibi olaraq ölkəmizin təsviri sənətinə böyük, əvəzsiz töhfə verdi.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
