Tovuzda bağlı qapı arxasında qalan yaşlı qadın xilas edilib
Tovuz, 17 avqust, Ruslan Novruzoğlu, AZƏRTAC
Tovuzda 90 yaşlı qadın mənzildə bağlı qapı arxasında köməksiz vəziyyətdə qalıb. Hadisə Tovuz şəhərinin Xəqani küçəsində qeydə alınıb.
AZƏRTAC xəbər verir ki, həmin ünvanda yaşayan 1934-cü il təvəllüdlü Zərnə Məmmədovanın evdə qəfil ürəyi tutub və yerə yıxılıb.
Qonşular yaşlı qadından xəbər tuta bilmədiyi üçün Fövqəladə Hallar Nazirliyinin qaynar xəttinə məlumat veriblər. FHN-in Xüsusi Riskli Xilasetmə Xidmətinin xilasediciləri çağırış üzrə əraziyə cəlb olunublar. Xilasedicilər xüsusi vasitələrin köməyi ilə beşmərtəbəli yaşayış binasının 3-cü mərtəbəsində yerləşən mənzilə daxil olublar, 1934-cü il təvəllüdlü qadını halsız vəziyyətdə aşkar edərək ona müvafiq köməklik göstərib və təcili tibbi yardım briqadasına təhvil veriblər.
Hadisə yerinə polis əməkdaşları cəlb olunublar.
Bölmənin digər xəbərləri
