Tufandağda quraşdırılmış Avtomat Meteoroloji Stansiyanın fəaliyyəti bərpa olunmuşdur
Bakı, 17 oktyabr (AZƏRTAC). Azərbaycan meteorologiyasında mühüm rol oynayan hidrometeoroloji rejimi öyrənmək məqsədi ilə 2010-cu ilin avqustunda Tufandağ zirvəsinin 4 min 172 metr hündürlüyündə quraşdırılmış Avtomat Meteoroloji Stansiyanın fəaliyyəti bərpa olunmuşdur.
Ekologiya və Təbii Sərvətlər Nazirliyinin (ETSN) mətbuat xidmətindən AZƏRTAC-a bildirmişlər ki, bu günlərdə Tufandağ ərazisindəki Avtomat Meteoroloji Stansiyadan məlumat ötürülməsi kəsilmişdi. Bunun səbəblərini araşdırmaq üçün ETSN-in, Şahdağ Kompleks Hidrometeoroloji və Ekoloji Tədqiqat Elm Mərkəzinin əməkdaşlarından ibarət ekspedisiya qrupu stansiyaya baxış keçirmişlər. Baxış zamanı güclü külək və ildırımvurma səbəbindən ötürücü antenanın aşması məlum olmuşdur.
Görülən tədbirlər nəticəsində hava haqqında məlumatın Milli Hidrometeorologiya Departamentinə müntəzəm ötürülməsi təmin edilmişdir. Küləklə işləyən elektrik generatorundan və günəş panellərindən qidalanan stansiyadan sonuncu məlumat oktyabrın 17-də saat 12:00-da daxil olmuşdur.
Stansiyada veb-kameranın quraşdırılması işlərinə hazırlıq gedir.
Bölmənin digər xəbərləri
