Turistlər Azərbaycanda öz ölkələrinin tətbiqi ilə ödəniş edə biləcəklər
Bakı, 9 oktyabr, AZƏRTAC
Turistlər Azərbaycanda öz ölkələrinin tətbiqi ilə ödəniş edə biləcəklər.
AZƏRTAC xəbər verir ki, bunu Azərbaycan Mərkəzi Bankının məhsul meneceri Emil Ağcayev “Bakı Fintex Forum-2025”də çıxışı zamanı deyib.
AZ-QR standartının beynəlxalq normalara əsaslandığını deyən E.Ağcayev diqqətə çatdırıb ki, bu standartın əsas üstünlüyü müxtəlif bank və fintex sistemlərində problemsiz işləyə bilməsidir.
“AZ-QR beynəlxalq standartlara uyğun hazırlandığı üçün digər ölkələrin QR ödəniş sistemləri ilə asan inteqrasiya olur. Bu isə o deməkdir ki, Türkiyə və ya Qazaxıstanla inteqrasiyamız olarsa, həmin ölkədən gələn turistlər öz bank tətbiqləri ilə Azərbaycanda QR ödənişlərini rahat şəkildə həyata keçirə biləcəklər”, - deyə E.Ağcayev bildirib.
O əlavə edib ki, bu praktika artıq Asiya ölkələrində geniş yayılıb və ölkələr bir-birinin QR sistemlərini tanıyır, dəstəkləyir: “Azərbaycan da bu istiqamətdə irəliləyərək fintex sahəsində beynəlxalq inteqrasiyanı hədəfləyir”.
Bölmənin digər xəbərləri
