Turizm məhsullarının formalaşdırılması üzrə ardıcıl olaraq işlər görülür
Bakı, 25 dekabr, AZƏRTAC
Mədəniyyət və Turizm Nazirliyi tərəfindən ardıcıl olaraq turizm məhsullarının formalaşdırılması üzrə işlər görülür.
Nazirliyin mətbuat xidmətindən AZƏRTAC-a bildirilib ki, bu sahədə turizm marşrutları, qış turizmi, regionlarda festivalların təşkili xüsusi yer tutur.
Nazirliyin müvafiq qərarı ilə 7 əsas turizm marşrutu təsdiq edilərək, onların inkişaf planına dair layihə hazırlanır. Bu marşrutlar Bakı-Səlyan-Masallı-Lənkəran, Bakı-Göyçay-Mingəçevir-Gəncə-Şəmkir-Tovuz-Ağstafa-Qazax, Bakı-Şamaxı-İsmayıllı-Qəbələ-Şəki-Zaqatala-Balakən, Abşeron yarımadası-Bakı-Qobustan, Bakı-Şabran-Quba-Qusar-Xaçmaz, Bakı-Naxçıvan, Bakı-Şuşanı əhatə edir. Belə layihələrin hazırlanmasında məqsəd regionlarımızın bütün istiqamətləri üzrə xidmət səviyyəsinin yaxşılaşdırılması, məlumatlandırma sisteminin təkmilləşdirilməsi, regionlarda turizm gecələmələrinin sayının artırılması və mövsümlük problemlərinin aradan qaldırılmasını təmin etməkdir.
Qış turizmi sahəsində layihələrdən biri də ölkəmizdə yaradılmış komplekslərdir. “Şahdağ” Qış-Yay Turizm Kompleksi Qusar rayonunun mərkəzindən 32 kilometr məsafədə “Şahdağ” Milli Parkının yaxınlığında, “Tufan Dağ” Xizək Yay-Qış İstirahət Kompleksi isə Qəbələdən 5 kilometr məsafədə yerləşir. Azərbaycanda və ümumiyyətlə dünyada ən mükəmməl layihələrdən biri olan “Şahdağ” Qış-Yay Turizm Kompleksi respublikamızda dağ-xizək idmanı və digər qış idman növlərinin inkişafı üçün hərtərəfli imkanlar açıb.
“Şahdağ” Qış-Yay Turizm Kompleksi fəaliyyətə başladığı gündən etibarən təxminən iki yüz minədək yaxın yerli və əcnəbi turist kompleksin xidmətlərindən istifadə edib.
Rayonlarda bölgənin cəlbediciliyini artırmaq üçün hər il müxtəlif festivallar keçirilir. Mədəniyyət və Turizm Nazirliyinin və Qəbələ Rayon İcra Hakimiyyətinin birgə təşkilatçılığı ilə bu il “Qafqaz Karvansaray” mehmanxanasında keçirilmiş ikinci mürəbbə festivalı qonaqların böyük marağına səbəb olub.
Ötən il bu festivalda 8 rayondan, bu il isə 21 şəhər və rayondan şirniyyatçıların iştirakı tədbirin nüfuzunun ildən-ilə artmasından xəbər verir.
Bundan əlavə, Qəbələnin ictimai-siyasi həyatının əlamətdar hadisələrlə çox zəngindir. Bu şəhər ötən il MDB-nin mədəniyyət, bu il isə Azərbaycanın əfsanələr paytaxtı elan olunub. Həmçinin, Qəbələdə hər il beynəlxalq musiqi festivalları keçirilir.
Özünə məxsus füsunkar təbiəti olan Göyçayda keçirilmiş 9-cu nar bayramı çərçivəsində nar meyvəsinin mədəni-iqtisadi potensialının rəmzinə çevrilən çoxsaylı zəngin sərgilər, kompozisiyalar, folklor nümunələri nümayiş etdirilib.
Bu il Gəncə şəhərində keçirilmiş III Beynəlxalq Şərab Festivalında İtaliya, Fransa, Gürcüstan və Moldovadan olan şərab istehsalçıları, şərabçılıq ittifaqları və assosiasiyalarının iştirak ediblər. Qonaqlara Gəncənin tarixi-memarlıq abidələrinin və digər görməli yerlərinin tanıdılması məqsədilə ekskursiyalar təşkil olunub. Festivalda həm gələn qonaqlar, həm də yerli əhali tərəfindən şərab məhsullarının dequstasiyası aparılıb və onlara milli mətbəx nümunələri nümayiş etdirilib.
Masallı rayonunda keçirilmiş III Beynəlxalq Folklor Festivalında əvvəlki illərdən fərqli olaraq yerli kollektivlərlə yanaşı Rusiya, Türkiyə İran, Gürcüstan, Qazaxıstan, Latviya və Litva da təmsil olunub. Qonaqlara Masallı mətbəxinin ləziz yeməkləri təqdim olunub, eləcə də turizm obyektləri, tarix və mədəniyyət abidləri ilə də yaxından tanış olublar.
Azərbaycanın birinci xanımı, Heydər Əliyev Fondunun prezidenti Mehriban Əliyevanın böyük zəhməti sayəsində 2009-cu ildə Azərbaycan aşıq sənətinin UNESCO-nun Bəşəriyyətin Qeyri-Maddi Mədəni İrsinin Reprezentativ Siyahısına daxil edilməsi nəticəsində bu ölməz sənət haqlı olaraq dünya mədəniyyət inciləri sırasında özünə layiqli yer tutub. Cari ildə Bakıda keçirilmiş II Beynəlxalq Aşıq Festivalında Türkiyə, İran, Gürcüstan (Borçalı), Rusiya (Dağıstan), Qazaxıstan, Türkmənistan, Özbəkistan aşıq və ozanları iştirak ediblər.
Festival çərçivəsində aşıqların məkanı olan Qazaxda, Gədəbəydə və Tovuzda aidiyyəti tədbirlər keçirilib. Bu tədbirlərin mütəmadi olaraq Mədəniyyət və Turizm Nazirliyinin dəstəyi və təşkilatçılığı ilə həyata keçirilməsi gündən-günə inkişaf edən və gözəlləşən doğma diyarımızın dünyada tanıdılmasında böyük rolu vardır.
Qeyd etmək lazımdır ki, son illər ölkəmizin müxtəlif bölgələrində keçirilən festivallar bölgələrə turist axınının artmasına və mövsümiliyin aradan qaldırılmasına şərait yaradır.
Bölmənin digər xəbərləri
