Türkiyə milli azadlıq mübarizəsindən bəhs edən səyyar muzey Azərbaycana gələcək
Ankara, 7 oktyabr, AZƏRTAC
Kolleksiyasında Türkiyənin milli azadlıq mübarizəsinə, o cümlədən Çanaqqala döyüşünə həsr edilmiş eksponatlar olan səyyar muzeyin Azərbaycana göndərilməsi planlaşdırılır.
AZƏRTAC xəbər verir ki, bu barədə jurnalistlərə Gelibolu Çanaqqala Döyüş Tarixi Kompleksinin rəhbəri İsmayıl Kaşdemir məlumat verib.
Onun sözlərinə görə, səyyar muzey artıq Türkiyənin 81 vilayətinin hər birində, eləcə də Balkan regionunun bir neçə ölkəsində olub.
“Bizim planlarımıza səyyar muzeyin Azərbaycana göndərilməsi də daxildir, çünki bu qardaş ölkənin çoxlu övladı Çanaqqala döyüşündə iştirak edib”, -deyə Kaşdemir qeyd edib.
Layihənin məqsədi türk tarixinə marağı artırmaq və tarixi döyüş yerlərini ziyarət etməkdir.
Direktor əlavə edib ki, muzey indiyədək 270 min kilometrdən çox yol qət edib, ziyarətçilərin sayı isə 1 milyona çatıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
