Türkiyəli iş adamları Xaçmaza səfər ediblər
Xaçmaz, 6 iyul, Elxan Yusifli, AZƏRTAC
Türkiyəli iş adamları Xaçmaz rayonunda olublar.
Xaçmaz Rayon İcra Hakimiyyətindən AZƏRTAC-ın bölgə müxbirinə verilən məlumata görə, rayonla tanışlıq xarakterli səfərdə “Albayrak group”un idarə heyətinin üzvü İbrahim Karaca və digər iş adamları iştirak ediblər.
Xaçmaz Rayon İcra Hakimiyyətinin başçısı Elnur Rzayev qonaqlara rayonun potensial imkanları və sosial iqtisadi uğurları barədə ətraflı məlumat verərək bildirib ki, kənd təsərrüfatı və turizmin inkişafı üçün geniş imkanları olan rayonda bağçılığa böyük maraq var. Son illər rayonda intensiv bağçılıq inkişaf edir. Xaçmaz rayonu 70 kilometr məsafədə Xəzər dənizinin sahili ilə əhatə olunub. Bu isə dənizkənarı ərazilərdə turizmin inkişafı üçün əlverişli imkanlar yaradır.
İbrahim Karaca Xaçmazla tanışlıqdan məmnunluğunu ifadə edib və yerli iş adamları ilə müxtəlif sahələr üzrə qarşılıqlı əməkdaşlıqda maraqlı olduqlarını bildirib.
Bölmənin digər xəbərləri
