Türkiyənin Tokat vilayətində daşqın riski səbəbindən yüzlərlə ev və müəssisə təxliyə edilib
Ankara, 21 may, AZƏRTAC
Türkiyə Fövqəladə Halları İdarəetmə İdarəsinin (AFAD) qərarı ilə Tokat vilayətinin şimalında yerləşən və suyun səviyyəsinin 100 faizə çatdığı Almus su anbarı yaxınlığındakı yüksəkriskli daşqın zonasında 464 evin sakini və 42 müəssisənin işçisi təxliyə edilib.
AZƏRTAC xəbər verir ki, AFAD-ın direktoru Ali Hamza Pehlivan potensial fəlakət bölgəsinə baş çəkib. O qeyd edib ki, Yeşilırmak çayındakı Almus su anbarı yaxınlığında daşqın riski səbəbindən 842 nəfər qonaq evlərində yerləşdirilib, 13 min başdan çox mal-qara və qoyun daha təhlükəsiz ərazilərə təxliyə edilib.
Turhal rayonunda subasma riski səbəbindən müəssisələrin və ticarət obyektlərinin ətrafında qum torbalarından maneələr qurulub. “Qonşu Sivasda daşan Kılıçkaya su anbarı ətrafındakı ərazidə də vəziyyət kritikdir. Kelkit və Yeşilırmak vadilərində artıq daşqınlar barədə məlumat verilib. Dərəlik ərazilərdə yaşayan əhalini daşqın sularından qorumaq üçün istehkamlar qurulur. Hazırda itki yoxdur”, - deyə AFAD rəhbəri bildirib.
Bölmənin digər xəbərləri
