Türkiyənin “Yeni çağ” qəzeti Azərbaycanın İstanbuldakı baş konsulunun Xocalı soyqırımı barədə məqaləsini yayıb
İstanbul, 23 fevral, AZƏRTAC
Türkiyənin nüfuzlu “Yeni çağ” qəzeti Azərbaycanın İstanbuldakı baş konsulu Həsən Zeynalovun Xocalı soyqırımı barədə “Türk olduqları üçün qətlə yetirildilər” sərlövhəli məqaləsini dərc edib.
Sovetlər birliyinin süqutu ərəfəsində SSRİ-də baş verən proseslərə nəzər salan baş konsul yazır ki, ümummilli lider Heydər Əliyev sovet hökumətində tutduğu bütün vəzifələrdən məqsədyönlü şəkildə uzaqlaşdırıldıqdan sonra təcavüzkar Ermənistan dövləti Azərbaycana qarşı əsassız iddialara başladı. Xocalı soyqırımını Azərbaycan xalqının uzun zaman kəsiyində məruz qaldığı qətliamlardan biri olduğunu diqqətə çatdıran müəllif yazır ki, erməni millətçiləri zaman-zaman xalqlarımıza qarşı həyata keçirdikləri cinayətləri ört-basdır etmək üçün siyasi gündəmə gətirdikləri uydurma “erməni soyqırımı” mövzusu ilə bəd niyyətlərini gerçəkləşdirməkdə israrlıdırlar.
Ermənistanın Türkiyəyə qarşı əsassız ərazi və təzminat iddialarının və ermənilərin tarixi proseslərə dair uydurduqları yalanların yaratdığı təhlükələrə dair maraqlı mülahizələrin yer aldığı məqalədə əsaslandırılır ki, ermənilər heç bir halda Azərbaycana və Türkiyəyə pis niyyətlərindən əl çəkməyəcəklər. Çünki tarixin bütün dövrlərində ermənilər onlara edilən yaxşılığın qarşısında xalqlarımızın qanını töküblər.
Məqalədə qeyd edilir ki, Xocalı soyqırımı zamanı həlak olan, ömürlük şikəst edilən, əsirlikdə ağır işgəncələrə məruz qalan, taleyindən xəbər olmayan soydaşlarımızın başlarına bu müsibətlərin gətirilməsinin yeganə səbəbi onların milli mənsubiyyətidir.
Məqalə qəzetin elektron versiyası olan www.yenicaggazetesi.com.tr saytında da yerləşdirilib.
Sabir Şahtaxtı
AZƏRTAC-ın xüsusi müxbiri
İstanbul
Bölmənin digər xəbərləri
