“Turon” Akademiyasının prezidenti Ermənistanın işğalçı siyasətini pisləyib
Bakı, 27 iyul, AZƏRTAC
Özbəkistanın “Turon” Akademiyasının prezidenti, Leybnis adına Avropa Təbiət Elmləri Akademiyasının akademiki, Nuri Xucand adına Mərkəzi Asiya Xalq Akademiyasının akademiki, tarix elmləri doktoru, “Turon tarixi” jurnalının baş redaktoru Haydarbek Bababekov Azərbaycanın Tovuz rayonunda provokasiya təşkil edən Ermənistanın işğalçı və təcavüzkar siyasətini pisləyib.
AZƏRTAC xəbər verir ki, “Turon” Akademiyasının prezidenti H.Bababekovun Özbəkistandakı Heydər Əliyev adına Azərbaycan Mədəniyyət Mərkəzinə göndərdiyi bəyanatında deyilir: “Erməni tərəfi ictimaiyyətin diqqətini Dağlıq Qarabağ problemindən və öz əhalisinin diqqətini Ermənistanda pandemiya problemindən yayındırmaq üçün bu provokasiyanı əvvəlcədən planlaşdırıb.
Tarix çox yaxşı bilir ki, hökumət öz xalqının diqqətini çətin problemdən və öz hökumətinin yaratdığı təhlükədən yayındırmaq istəyəndə qonşu ölkələrlə müharibəyə başlamağa və ictimaiyyətin diqqətini yayındırmağa çalışır. İndi də belə vəziyyət yaranıb - Ermənistan öz əhalisinin diqqətini ümdə problemlərdən yayındırmaq üçün belə bir avantürist addım atmağı qərara alıb. Bunun üçün onlar hətta ən iyrənc metodlara da əl atırlar.
Onlar ermənilərin milli ruhunu, vətənpərvərlik ruhunu coşdurmaq istəyir, əllərinə silah verir və deyirlər: “Get, millət naminə, Vətən naminə öldür və öl!”. Lakin bu halda “millət” və “Vətən” dedikdə özlərini nəzərdə tuturlar.
Düşmən kimdir? Öz Vətənini işğalçılardan müdafiə edən və öz qanuni ərazisini azad etmək istəyənmi?! Bəs sərhədi keçən və Dağlıq Qarabağı işğal edən kimdir? (yeri gəlmişkən onların diqqətinə çatdırırıq ki, “Qarabağ” - qədim türk sözüdür və mənası “böyük bağ” deməkdir).
Azərbaycan ərazisinin 20 faizini kim işğal edib? Atəşkəs haqqında sazişi birinci olaraq kim pozub? Mən burada başqa nüfuzlu beynəlxalq təşkilatlar haqqında heç nə demirəm, yalnız bunu xatırladıram ki, həmin təşkilatlar bir neçə dəfə rəsmən bəyan ediblər: Ermənistan-Azərbaycan münaqişəsi dinc yolla həll edilməlidir!
Problemin yeganə həlli Azərbaycanın işğal edilmiş 20 faiz ərazisini qaytarmaq, etnik təmizləməyə məruz qalmış, 30 ildən çox bundan əvvəl doğma yurdlarından qovulmuş insanların Vətənə qayıtması və Ermənistanın qonşu dövlətlərə qarşı ərazi iddialarından əl çəkməsidir. Əks halda, regionda bu münaqişə həll edilməyəcək, vəziyyət daha təhlükəli fazaya çatacaq.
Mən Azərbaycan Prezidenti İlham Əliyevin və Türkiyə hökumətinin ermənilərin təcavüzünə münasibətdə strategiya və taktikasının tamamilə dəstəkləyirəm və inanıram ki, Azərbaycan xalqı işğala və təcavüzə qalib gələcək.
Biz öz qardaşlarımızı - iki əsrə yaxın müddətdə ədalətsizliyə, etnik təmizləmələrə, soyqırımına, regionda müxtəlif haqsızlıqlara məruz qalan Azərbaycan türklərini dəstəkləyirik, qoy Ulu tanrı bizim qardaşlarımıza kömək olsun”.
Bölmənin digər xəbərləri
