UEFA Çempionlar Liqasında çıxış etmək “Qarabağ” klubunun güclü rəqib olduğunu göstərir
London, 12 sentyabr, AZƏRTAC
Ağdamın “Qarabağ” futbol komandası dünyanın ən mötəbər klub turniri olan UEFA Çempionlar Liqasının qrup mərhələsinə vəsiqə qazanmaqla adını Azərbaycan idmanının tarixinə qızıl hərflərlə yazdı. Bu uğur, eyni zamanda, qısa müddətdə qitənin, eləcə də dünyanın aparıcı futbol nəşrlərinin diqqətini Azərbaycan futboluna, xüsusilə “Qarabağ” klubuna yönəltdi. Həmin vaxtdan etibarən aparıcı idman nəşrlərində yer alan yazılarda “Qarabağ” komandasının nailiyyətləri ətraflı işıqlandırılıb, klubun tarixinə geniş yer verilib, xüsusən onun təmsil etdiyi Ağdam şəhərinin 25 ildir Ermənistan silahlı qüvvələrinin işğalı altında qalması diqqətə çatdırılıb.
“Qarabağ” komandasının UEFA Çempionlar Liqasının qrup mərhələsində ilk dəfə iştirak etməsi Ağdam təmsilçisinin rəqibi olan klubların azarkeşləri tərəfindən də böyük maraq və rəğbətlə qarşılanıb. Bu gün dünyanın ən güclü klublarından sayılan “Çelsi”nin qonağı olan “Qarabağ” komandası ilə görüşü ingilis futbolsevərlər də böyük maraqla gözləyirlər.
AZƏRTAC-ın Londondakı xüsusi müxbiri “Çelsi”-“Qarabağ” matçının başlamasına bir neçə saat qalmış İngiltərə paytaxtında futbol həvəskarlarının bu qarşılaşma, eləcə də Ağdam təmsilçisi ilə bağlı fikirlərini öyrənib.
“Bu oyun ona görə maraqlıdır ki, “Qarabağ” UEFA Çempionlar Liqasında ilk dəfə iştirak edir”, - deyən “Çelsi” komandasının azarkeşlərindən olan London sakini Tiziano D’Augusta bildirib ki, belə mötəbər turnirdə çıxış etmək “Qarabağ”ın kifayət qədər güclü rəqib olduğunu göstərir. “Qarabağ” komandasına və bu klubun bütün azarkeşlərinə uğurlar arzu edirəm”.
İngilis azarkeşlər rəqib komanda olmasına baxmayaraq, “Qarabağ” klubunun UEFA Çempionlar Liqasının qrup mərhələsinə yüksəlməsini böyük uğur kimi qiymətləndirirlər. Bir neçə Azərbaycan şirkəti ilə ortaq layihələrdə iştirak edən və ölkəmizlə bağlı kifayət qədər məlumatlı olan daha bir “Çelsi” azarkeşi Daniel Bovler “Qarabağ” futbol komandasının mötəbər turnirin qrup mərhələsinə yüksəlməsinin böyük uğur olduğunu deyib. O bildirib ki, “Qarabağ”ın UEFA Çempionlar Liqasının qrup mərhələsinə ilk dəfə vəsiqə qazanması Azərbaycan futbolu üçün böyük uğurdur. D.Bovler “Çelsi”nin azarkeşi olmasına baxmayaraq, “Qarabağ” komandasının da nailiyyətinə çox sevindiyini və klubun uğurlarını görməkdən şad olacağını vurğulayıb.
“Qarabağ” komandasının uğurlarını geniş təbliğ etdiklərini deyən Avropa Azərbaycan Cəmiyyətinin (TEAS) mətbuat katibi Neil Uatson bildirib ki, TEAS bir neçə ay əvvəl Londonda “Qarabağ” klubuna həsr olunmuş filmin təqdimatını keçirib. Filmdə klubun tarixi, uğurları barədə ətraflı söhbət açılır. Ekran əsərində “Qarabağ”ın mənsub olduğu Ağdam şəhərinin işğalçı Ermənistan tərəfindən zəbt edildiyi xüsusi vurğulanır. Məhz bu işğalın nəticəsidir ki, klub ev oyunlarını doğma divarlar arasında deyil, paytaxt Bakıda keçirir. “Qürurverici haldır ki, bu gün “Qarabağ” Avropanın ən güclü klublarının mübarizə apardığı mötəbər turnirdə çıxış etmək hüququ qazanıb. Bu, Azərbaycan futbolunun böyük uğurudur. Bu gün “Çelsi” ilə oyunda dünyanın bütün ölkələrində yaşayan azərbaycanlılarla yanaşı, Azərbaycanın dostları da “Qarabağ”a azarkeşlik edəcəklər. Çünki komanda bütün Azərbaycanı təmsil edir. Mən “Qafqazın Barselonası”nın bu turnirdə uğurla çıxış edəcəyinə inanıram”, - deyə Neil Uatson qeyd edib.
Qarşılaşmanın keçiriləcəyi “Stamford Bridge” stadionunun ətrafında çoxminli “Çelsi” tərəfdarları ilə yanaşı, azərbaycanlı azarkeşləri də görmək mümkündür. Belə azarkeşlərdən biri - Britaniyada fəaliyyət göstərən azərbaycanlı kikboksçu Hafiz Baxşəliyev “Qarabağ” komandasının parlaq nailiyyəti ilə bütün xalqımızı sevindirdiyini xüsusi vurğulayaraq deyib: “Biz, xaricdə yaşayan azərbaycanlılar həmişə arzu ediblər ki, Azərbaycan komandaları da mühüm beynəlxalq yarışlarda yüksək nailiyyətlər qazansın. Bu il biz öz arzumuza çatdıq. “Qarabağ” klubu UEFA Çempionlar Liqasının qrup mərhələsinə yüksəlməklə təkzə öz azarkeşlərini deyil, bütün azərbaycanlıları sevindirdi. Doğma Qarabağımızın adını daşıyan klubun Azərbaycanı dünyanın ən mötəbər futbol turnirlərindən olan UEFA Çempionlar Liqasında təmsil etməsi bizim üçün ikiqat sevinc və fərəh hissi doğurur. Bu gün Londonda güclü rəqiblə - “Çelsi” ilə qarşılaşmasına baxmayaraq, “Qarabağ”ımıza inamımız və dəstəyimiz sonsuzdur.
Xatırladaq ki, “Qarabağ” futbol klubun UEFA Çempionlar Liqasının “C” qrupunda “Çelsi”, “Atletiko Madrid” və “Roma” komandaları ilə eyni qrupda mübarizə aparır. “Qarabağ” ilk oyununu bu gün “Çelsi” klubu ilə keçirəcək. Qarşılaşma Bakı vaxtı ilə saat 22:45-də start götürəcək.
Orxan İsmayılov
AZƏRTAC-ın xüsusi müxbiri
London
Bölmənin digər xəbərləri
