Ukrayna iqtisadiyyatında tənəzzül bir qədər zəifləyib
Kiyev, 11 sentyabr, AZƏRTAC
2020-ci ilin yanvar-iyul aylarında Ukraynada real ümumi daxili məhsul (ÜDM) 6,2 faiz azalıb. Bu, cari ilin ilk altı ayı ərzində 6,5 faiz azalma ilə müqayisədə bir qədər yaxşı göstəricidir.
AZƏRTAC xəbər verir ki, bu məlumat Ukrayna İqtisadiyyat Nazirliyinin Strateji Planlaşdırma və Makroiqtisadi Proqnozlaşdırma Departamentinin icmalında öz əksini tapıb.
2020-ci ilin yanvar-iyul aylarının yekunlarına görə, iqtisadi fəaliyyətin əsas növləri üzrə əmtəə və xidmətlər istehsalının məcmu indeksi 7,3 faiz azalıb. Müqayisə üçün qeyd edək ki, 2020-ci ilin yanvar-iyun ayları üzrə bu göstərici 7,7 faiz azalıb.
İdarədə qeyd ediblər ki, bu göstəricilər Ukrayna iqtisadiyyatının tədricən bərpa olunması prosesinin davam etdiyini və xüsusən aprel ayındakı lokdaundan sonra iqtisadiyyatın əsas sahələrinin tədricən dirçəlməsinə dəlalət edir.
Rüstəm Məmmədov,
Kiyev
Bölmənin digər xəbərləri
