UKRAYNA PREZİDENTİ OLİMPİYA QALİBLƏRİNƏ TƏQAÜD TƏYİN ETMİŞDİR

19.08.2004 [21:21]
Çap et
A⁺ A^-

AZƏRTAC-ın Ukrinformdan aldığı xəbərdə deyilir ki, Ukrayna Prezidenti Leonid Kuçma “Olimpiya, Paralimpiya və Deflimpiya oyunlarının çempionalarına və mükafatçılarına dövlət təqaüdləri haqqında” fərman imzalamışdır.

Fərmana uyğun olaraq, Olimpiya, Paralimpiya və Deflimpiya oyunlarının çempionları 1600 qrivna (300 dollar), gümüş mükafatçıları 1300 qrivna (245 dollar), bürünc mükafatçıları 1000 qrivna (190 dollar) alacaqlar.

Cinayətkarlığa görə cəzalandırıldıqda, yaxud Beynəlxalq Olimpiya Komitəsinin, Milli Olimpiya Komitəsinin və ya mükafat qazandığı növ üzrə federasiyanın qərarı ilə yarışlarda çıxış etmək hüququnu itirdikdə idmançı təqaüddən məhrum ola bilər.

İdmançı xarici ölkəyə iki aydan artıq müddətə işləməyə getdikdə və ya digər hallarda (ezamiyyətlər istisna olmaqla) təqaüdün ödənilməsi o, Ukraynaya qayıdana qədər dayandırılır.

İdmançı vəfat etdikdə onun azyaşlı uşaqları yetkinlik yaşına çatanadək təqaüdün 50 faizini alacaqlar.