Bakı, 11 dekabr, AZƏRTAC

Ümummilli liderimiz Heydər Əliyevin vəfatının ildönümü ilə əlaqədar Səbail rayonunda Ulu Öndərin əziz xatirəsi dərin hörmət və ehtiramla anılır.

Səbail Rayon İcra Hakimiyyətindən AZƏRTAC-a bildirilib ki, rayon rəhbərliyinin, Milli Məclisin deputatlarının, elm və mədəniyyət xadimlərinin, rayonun idarə və təşkilat, ali və orta təhsil müəssisələrinin, veteran və gənclər təşkilatlarının, din xadimlərinin, rayon ictimaiyyətinin və KİV nümayəndələrinin iştirakı ilə Azərbaycan Dövlət Musiqili Teatrında ulu öndər Heydər Əliyevin xatirəsinə həsr olunmuş təntənəli anım mərasimi keçirilib.

Əvvəlcə tədbir iştirakçıları Ulu Öndərin xatirəsini 1 dəqiqəlik sükutla yad ediblər.

Anım mərasimində rayon icra hakimiyyətinin başçısı Asif Əsgərov Azərbaycan xalqının ümummilli lideri Heydər Əliyevin həyat və fəaliyyəti, onun müasir tariximizdəki rolu barədə geniş məruzə ilə çıxış edib. Natiq qeyd edib ki, müasir müstəqil Azərbaycanın qurucusu Heydər Əliyev dövrümüzün ən parlaq simalarından və nadir şəxsiyyətlərindən biridir. O, şərəfli həyat və fəaliyyəti ilə tarixi min illərlə hesablanan, dünyanın zəfər salnaməsinə şanlı səhifələr yazmış qədim bir xalqın simvolu səviyyəsinə yüksəlib.

Diqqətə çatdırılıb ki, ulu öndər Heydər Əliyevin cəmiyyətin iqtisadi, siyasi, sosial, mədəni sahələrinin ən müxtəlif aspektlərini əhatə edən geniş diapazonlu və hamıya örnək olan fəaliyyəti, müasir dövrün ən aktual problemlərinə yaradıcı münasibəti onu ümummilli liderdən, rəhbər və siyasi xadimdən bəşəri ideyaların carçısına, ümumbəşəri dəyərləri daim zənginləşdirən hikmət və söz sahibinə çevirib. Bu gün hər bir qədirbilən Azərbaycan vətəndaşının qəlbində Ulu Öndərin ölməz işıqlı obrazı yaşayır.

Rayon icra hakimiyyətinin başçısı bildirib ki, Ulu Öndər müstəqil Azərbaycanın sosial-iqtisadi və siyasi əsaslarının möhkəmləndirilməsi, dünyanın aparıcı dövlətlərinin etibarlı tərəfdaşına çevrilməsi istiqamətində, sözün həqiqi mənasında, böyük işlər görüb. Bu dahi şəxsiyyət millətini bütün bəlalardan hifz edərək qoruyub, respublikada ictimai-siyasi sabitliyi təmin edib, vətəndaş qarşıdurmasını aradan qaldırıb, ölkənin parçalanmasının qarşısını almaqla milli qurtuluşumuza nail olub.

Qeyd olunub ki, Azərbaycanı öz siyasi iradəsi və uzaqgörən dövlətçilik təcrübəsi ilə firavan həyata qovuşduran ümummilli lider Heydər Əliyevin vəfatının on birinci ildönümü Bakının Səbail rayonunun ictimaiyyəti tərəfindən də dərin kədər hissi ilə qeyd edilir. Bu münasibətlə rayonda anım tədbirləri keçirilib. Orta məktəblərdə müxtəlif ədəbi-bədii kompozisiyalar təşkil olunub, əbədiyaşar liderin zəngin həyatından, görkəmli fəaliyyətindən bəhs edən stendlər hazırlanıb.

Anma tədbirinin bədii hissəsində Azərbaycan Televiziyası və Radiosunun “Niyazi” adına simfonik orkestri və Cahangir Cahangirov adına xor, tanınmış ifaçılar çıxış ediblər.