“Ulu Öndər silahdaşlarının xatirələrində” kitabının təqdimatı olub
Bakı, 11 noyabr, AZƏRTAC
Azərbaycan Respublikası Mədəniyyət Nazirliyinin təşkilatçılığı və “Caspian Event Organisers” şirkətinin təşkilati dəstəyi ilə keçirilən 9-cu Bakı Beynəlxalq Kitab Sərgisi çərçivəsində noyabrın 11-də Ümummilli Lider Heydər Əliyevin 100 illiyi münasibətilə Dövlət Təhlükəsizliyi Xidməti (DTX) tərəfindən hazırlanan “Ulu Öndər silahdaşlarının xatirələrində” kitabının təqdimatı keçirilib.
AZƏRTAC xəbər verir ki, təqdimatda çıxış edən Azərbaycan təhlükəsizlik orqanlarının veteranı Azər Qarayev Ulu Öndər Heydər Əliyevin təhlükəsizlik orqanlarındakı əvəzsiz xidmətlərindən danışıb.
Digər çıxış edənlər - Dövlət Təhlükəsizliyi Xidmətinin mətbuat xidmətinin rəisi Tamerlan Rəhimov, “Şərq-Qərb” nəşriyyat evinin direktoru Sevil İsmayılova və AMEA Nizami Gəncəvi adına Ədəbiyyat İnstitutunun Ədəbi tənqid şöbəsinin aparıcı elmi işçisi, filologiya üzrə fəlsəfə doktoru, dosent Nərgiz Cabbarlı Ulu Öndər Heydər Əliyev və onun haqqında yazılan kitab barədə təəssüratlarını bölüşüblər.
Nəşrdə 42 veteran əməkdaşın Ümummilli Liderlə bağlı bölüşdükləri xatirələri, müxtəlif zamanlarda dövri mətbuatda dərc edilmiş məqalə və müsahibələri əks olunub.
Kitabın yazılmasında əsas məqsəd Ulu Öndərin xüsusi xidmət orqanlarında çalışarkən xalqının rifahı və Azərbaycanın təhlükəsizliyi yolunda etdikləri ilə bağlı yeni məqamları ictimaiyyə¬tin diqqətinə çatdırmaqdır.
Qeyd edək ki, kitabın “Ön söz”ü Azərbaycan Respublikası Dövlət Təhlükəsizliyi Xidmətinin rəisi general-polkovnik Əli Nağıyevə məxsusdur. Ümummilli Lider Heydər Əliyevin təhlükəsizlik orqanlarında fəaliyyətini ətraflı şərh edən Xidmət rəisi “Ön söz”də bildirir: “Vətənə sonsuz sədaqətlə xidmət missiyası ötən əsrin 40-cı illərinin əvvəllərindən təhlükəsizlik orqanlarındakı fəaliyyəti ilə başlayan Heydər Əliyevin həm bu orqanlarda işlədiyi vaxtda, həm də respublikaya rəhbərliyi zamanında dövlətçiliyimiz yolunda atdığı qətiyyətli addımlar, qəbul etdiyi müdrik siyasi qərarlar, vətəndaşlarımızın firavan həyatının təmin olunması, azərbaycançılıq ideologiyasının yaşadılması və davamlı olaraq təşviqi yönümündə gördüyü misilsiz və əvəzsiz işlər onu xalqımızın Ümummilli Liderinə çevirdi”.
Bölmənin digər xəbərləri
