Ulu Öndərin 100 illiyinə həsr olunmuş “Diplomatiya Həftəsi” başa çatıb
Bakı, 22 dekabr, AZƏRTAC
Dekabrın 18-22-də Azərbaycan Respublikasının Xarici İşlər Nazirliyi və ADA Universitetinin birgə təşkilatçılığı ilə yeni qrup "Diplomatiya Könüllüləri" üçün Ulu Öndər Heydər Əliyevin 100 illiyinə həsr edilmiş diplomatiya həftəsi təşkil olunub.
Xarici İşlər Nazirliyinin Mətbuat xidməti idarəsindən AZƏRTAC-a bildirilib ki, dekabrın 18-də diplomatiya həftəsi iştirakçıları Fəxri xiyabanı və Şəhidlər xiyabanını ziyarət edərək Ulu Öndər Heydər Əliyevin, habelə ərazi bütövlüyümüz uğrunda canlarından keçən şəhidlərimizin əziz xatirələrini dərin hörmət və minnətdarlıqla yad ediblər.
Sonra xarici işlər naziri Ceyhun Bayramovun və ADA Universitetinin rektoru Hafiz Paşayevin iştirakı ilə layihənin açılış mərasimi keçirilib.
Layihənin Ulu Öndərin həyatı, daxili siyasəti və parlamentarizmin inkişafında xidmətlərinə həsr olunmuş ilk günü çərçivəsində iştirakçılar Azərbaycan Respublikası Prezidentinin Katibliyinin sabiq rəisi Dilarə Seyidzadə, Milli Məclisdə Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov ilə görüşüb, Heydər Əliyev Fondu tərəfindən ərsəyə gətirilmiş, Ulu Öndər Heydər Əliyevin həyat və fəaliyyətinə həsr olunmuş “İz” sənədli filmini izləyib, habelə Heydər Əliyev Mərkəzini ziyarət ediblər.
“Diplomatiya Həftəsi”nin Ümummilli Liderin xarici siyasəti, habelə ordu quruculuğu fəaliyyətinə həsr olunmuş ikinci günü ərzində iştirakçıların Azərbaycan Respublikasının sabiq Baş naziri və xarici işlər naziri Həsən Həsənov, xarici işlər nazirinin müavini Fariz Rzayev, nazirliyin Mətbuat xidməti idarəsinin rəisi, mətbuat katibi Ayxan Hacızadə ilə görüşləri, habelə Cəmşid Naxçıvanski adına Hərbi Lisey və Hərbi Qənimətlər Parkına səfərləri təşkil olunub.
Ulu Öndər Heydər Əliyevin iqtisadi inkişaf və milli neft strategiyası barədə diplomatiya könüllülərinin məlumatlılığının artırılması məqsədilə iştirakçıların BP şirkətinin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli, İqtisadiyyat Nazirliyinin Dayanıqlı inkişaf və sosial siyasət şöbəsinin müdiri Hüseyn Hüseynov və Azərbaycan Respublikasının Dövlət Neft Şirkətinin (SOCAR) Media, ictimaiyyətlə əlaqələr və kommunikasiya Departamentinin rəis müavini Emin Axundzadə ilə görüşləri, SOCAR-ın inzibati binası və Heydər Əliyev adına Neft Emalı Zavoduna səfərləri həyata keçirilib.
Layihənin Ümummilli Liderin təhlükəsizlik orqanlarında fəaliyyəti, Yeni Azərbaycan Partiyasının yaradılmasında rolu, gənclər siyasəti, milli mətbuat və mədəniyyətin inkişafında xidmətlərinə həsr olunmuş dördüncü günü çərçivəsində gənclər və idman nazirinin müavini İndira Hacıyeva, Azərbaycan Dövlət Televiziyasının sədri Rövşən Məmmədov, Azərbaycan Dövlət İnformasiya Agentliyinin İdarə Heyətinin sədri Vüqar Əliyev, Dövlət Təhlükəsizlik Xidmətinin (DTX) Heydər Əliyev adına Akademiyasının rəisi polkovnik Elşad Nəsirov, DTX-nin “Alyans” Veteranlar Birliyinin sədr müavini polkovnik Əli Orucov, Yeni Azərbaycan Partiyasının nümayəndələri, Azərbaycan Respublikasının Mədəniyyət Nazirliyinin Strateji inkişaf və layihələrin idarə edilməsi şöbəsinin müdir müavini Yaşar Hüseynli ilə görüşlər keçirilib, Azərbaycan Dövlət Televiziyası və Azərbaycan Dövlət İnformasiya Agentliyinə səfərlər təşkil olunub.
Layihənin 5-ci günü təşkil olunan bağlanış mərasimində xarici işlər nazirinin müavini Yalçın Rəfiyev, Nazirliyin Mətbuat xidməti idarəsinin rəisi, mətbuat katibi Ayxan Hacızadə və Kadrlar idarəsinin rəisi Raman Məmmədov çıxış ediblər. Bağlanış mərasimində yeni qəbul olunmuş “Diplomatiya Könüllüləri”nə fəaliyyətlərində uğurlar arzulanıb, layihə iştirakçılarının çıxışları dinlənilib.
Tədbirin sonunda layihə iştirakçılarına sertifikatlar təqdim olunub.
Bölmənin digər xəbərləri
