Ümummilli Lider Heydər Əliyevin xatirəsi Latviyada anılıb
Bakı, 13 dekabr, AZƏRTAC
Dekabrın 12-də Azərbaycan xalqının Ümummilli Lideri Heydər Əliyevin vəfatının 22-ci ildönümü ilə əlaqədar Azərbaycan Respublikasının Latviyadakı Səfirliyində anım tədbiri keçirilib.
AZƏRTAC xəbər verir ki, əvvəlcə Ulu Öndər Heydər Əliyevin büstünün önünə əklil qoyulub və xatirəsi bir dəqiqəlik sükutla yad edilib.
Azərbaycanın Latviyadakı səfiri Elnur Sultanov müstəqil, müasir Azərbaycan dövlətinin qurucusu, görkəmli dövlət xadimi Heydər Əliyevin keçdiyi mənalı və şərəfli həyat yolundan və Azərbaycan xalqı qarşısında əvəzsiz xidmətlərindən bəhs edib. Səfir Ulu Öndərin Azərbaycan xalqını müstəqilliyə qovuşdurmuş, sabitlik və inkişafa aparmış tarixi şəxsiyyət olduğunu və onun siyasətinin layiqli davamçısı olan Prezident İlham Əliyevin rəhbərliyi altında ölkəmizin ərazi bütövlüyü və suverenliyinin bərpa olunduğunu və qüdrətli dövlətə çevrildiyini diqqətə çatdırıb.
Diplomat Ümummilli Liderin ölkəmizin çoxşahəli və tarazlı xarici siyasətinin əsasını qoyduğunu, o cümlədən Azərbaycan-Latviya əlaqələrinin banisi olduğunu və ötən dövr ərzində ikitərəfli əlaqələrimizin strateji tərəfdaşlıq səviyyəsinə yüksəldiyini qeyd edib.
Sonra Latviyada fəaliyyət göstərən “Azəri Vəhdət” cəmiyyətinin sədri Əlirza Hüseynov çıxış edib. O, Ulu Öndər Heydər Əliyevin xalqımızı mürəkkəb sınaqlardan uğurla çıxartdığını vurğulayaraq, onun xilaskarlıq missiyasından danışıb.
Tədbirdə Latviyada yaşayan Azərbaycan icmasının üzvləri, eləcə də Latviyada təhsil alan azərbaycanlı tələbələr iştirak ediblər.
Bölmənin digər xəbərləri
