“Uşaqlar üçün laboratoriya” layihəsi çərçivəsində növbəti təlim enerji mövzusuna həsr olunacaq
Bakı 6 may, AZƏRTAC
Mayın 16-da IDEA İctimai Birliyi və “Sevimli bala” təşkilatının birgə həyata keçirdiyi “Uşaqlar üçün laboratoriya” layihəsi çərçivəsində növbəti təlim keçiriləcək.
İctimai Birlikdən AZƏRTAC-a bildirilib ki, mütəmadi olaraq hər ay keçirilən və müxtəlif mövzuları əhatə edən “Uşaqlar üçün laboratoriya”nın may təlimi enerji mövzusuna həsr olunacaq.
Təlim zamanı uşaqlara elektrik enerjisi, onun əldə olunması, alternativ enerji mənbələri, enerjiyə qənaətlə bağlı maraqlı faktlar və məlumatlar çatdırılacaq, həmçinin “kiçik ekoloqlara” erkən yaşlardan aşılanması vacib olan təhlükəsizlik qaydaları izah ediləcək.
Bundan əlavə, gənc təbiətsevərlər bir sıra eksperimentlərdə iştirak edəcək, bəzi ərzaqlardan enerji alınması prosesinə əyani şahidlik edəcəklər. “Eko laboratoriya”nın iştirakçılarına öz elektrik dövrələrini yaratmaq və alternativ enerji ilə işləyən robotlarla oynamaq imkanı da yaradılacaq.
Təlim uşaqlara ətraf mühitin əsas amillərindən hesab olunan elektrik enerjisi ilə bağlı biliklər qazandırmaqla yanaşı, həm də enerjiyə qənaətin mühüm əhəmiyyətə malik olmasını kiçik yaşlarından mənimsəmələrinə yardım edəcək.
IDEA İctimai Birliyinin Azərbaycan Respublikası Prezidenti yanında Dövlət İdarəçilik Akademiyasında yerləşən Resurs Mərkəzində təşkil olunacaq təlimdə iştirak etmək istəyənlər 497-63-16 nömrəli telefona zəng edə bilərlər.
Bölmənin digər xəbərləri
