“Uşaqların informasiya təhlükəsizliyi: problemə kompleks yanaşma” mövzusunda konfrans keçirilib
Bakı, 2 oktyabr, AZƏRTAC
Ailə, Qadın və Uşaq Problemləri üzrə Dövlət Komitəsinin (AQUPDK) təşkilatçılığı ilə oktyabrın 2-də “Uşaqların informasiya təhlükəsizliyi: problemə kompleks yanaşma” mövzusunda konfrans keçirilib.
AZƏRTAC xəbər verir ki, açılış nitqi ilə çıxış edən Komitə sədri Bahar Muradova uşaqlara qarşı zorakılıqla mübarizənin bir istiqaməti kimi informasiya təhlükəsizliyi məsələsinin bütün cəmiyyətlərdə ilk yerdə dayandığını bildirib. Uşaqların zərərli informasiyadan qorunması istiqamətində ölkəmizdə güclü hüquqi bazanın formalaşdırıldığını qeyd edən Bahar Muradova bu istiqamətdə qəbul edilən müvafiq qanunvericilik aktlarının həyata keçirilməsində rəhbərlik etdiyi Komitənin, eləcə də müvafiq qurumların üzərinə böyük vəzifələr qoyduğunu diqqətə çatdırıb. O, “Uşaqların zərərli informasiyadan qorunması haqqında” Qanunun icrasına nəzarəti həyata keçirən müvafiq dövlət orqanları kimi Dövlət Komitəsi, Mədəniyyət Nazirliyi, Rəqəmsal İnkişaf və Nəqliyyat Nazirliyi, Audiovizual Şura olaraq müəyyənləşdirildiyini, 2021-ci ildə həmin qurumların rəsmi nümayəndələri və 3 müstəqil ekspert daxil olmaqla Ekspert Şurası yaradıldığını diqqətə çatdırıb.
Bahar Muradova Ailə, Qadın və Uşaq Problemləri üzrə Dövlət Komitəsinin bu sahədə istər dövlət qurumları, istərsə də özəl təşkilatlar, vətəndaş cəmiyyəti institutları ilə birgə fəaliyyət göstərdiyini diqqətə çatdırıb və görülən işlərdən, qarşıda duran vəzifələrdən danışıb.
Mədəniyyət nazirinin müavini Səadət Yusifova qeyd edib ki, infodemiya - müxtəlif məzmunlu informasiya bolluğu dövründə uşaqların zərərli, manipulyativ və saxta informasiyalardan qorunması olduqca vacibdir. O, uşaq və yeniyetmələri informasiya məkanında artan təhlükələrdən qorumaq məqsədilə dövlət tərəfindən hüquqi və əməli tədbirlərin görüldüyünü, sistemli fəaliyyət reallaşdırıldığını bildirib və bu sahədə Dövlət Komitəsinin fəaliyyətini yüksək qiymətləndirib. Nazirliyin sözügedən sahədə gördüyü işlər haqqında məlumat verən S.Yusifova, mədəniyyət konsepsiyasının işləndiyini və qanunvericilik aktlarının müasir dövrün tələblərinə uyğunlaşdırılması istiqamətində fəaliyyətin həyata keçirildiyini vurğulayıb.
Audiovizual Şuranın aparat rəhbəri Fazil Novruzov çıxışında informasiya kirliliyi dövründə təhlükəsizlik məsələləri ilə bağlı koordinasiyalı iş aparılmasının, həmçinin maarifləndirmənin əhəmiyyətindən danışıb. F.Novruzov, Azərbaycanda qeyd edilən sahədə böyük bir qanunvericilik bazası olduğunu, eyni zamanda müəyyən təkmiləşdirməyə ehtiyac olduğunu diqqətə çatdırıb. O, Audiovizual Şuranın mütəmadi olaraq televiziya və radio yayımında monitorinqlər həyata keçirdiyini, pozuntular aşkar edildikdə nəticələrə uyğun tədbirlər görüldüyünü qeyd edib.
Dövlət Komitəsinin sədr müavini, Ekspert Şurasının sədri Aynur Sofiyeva çıxış edərək, uşaqları təhlükəli informasiyadan qorumaq istiqamətində ictimai dəstəyin əhəmiyyətindən söz açıb. Bildirib ki, bu sahədə görüləcək tədbirlər uşaqları sağlam şəkildə yetişdirmək üçün atılacaq təməl addımlardan ən birincisi, gələcəyə olan yatırımdır. A.Sofiyeva informasiya təhlükəsizliyi ilə mübarizədə ən təsirli silahın təbii immunitet çevrəsinin yaradılmasının olduğunu bildirib.
Daha sonra “Uşaqlar arasında internetdən istifadə səviyyəsinin ölçülməsi məqsədilə aparılmış araşdırma”ya dair hesabatın təqdimatı keçirilib. “Gənclərin Tərəqqisinə Dəstək” İctimai Birliyinin rəhbəri Eldar Nağıyev təqdimatla çıxış edərək təhlil barədə məlumatları diqqətə çatdırıb.
Konfrans müzakirələrlə davam edib.
Azərbaycanda informasiya təhlükəsizliyi istiqamətində sistemli və kompleks addımlar atıldığını diqqətə çatdıran “Azərbaycan Televiziya və Radio Verilişləri” QSC-nin sədri Rövşən Məmmədov qeyd edib ki, bu məsələnin böyük önəm kəsb etməsi həm 44 günlük Vətən müharibəsi, həm də Qarabağda separatçı rejimin zərərsizləşdirilməsi məqsədilə keçirilən antiterror tədbirləri zamanı özünü göstərdi. Məsələnin qloballığına toxunan sədr, kiberhücumların əsas hədəfinin uşaqlar olduğunu bildirib, onları informasiya təhlükəsindən qorumaq üçün ilk növbədə, dünya təcrübəsinə əsasən, filtr sistemlərindən istifadənin önəmindən danışıb.
Çıxış edən Mətbuat Şurasının sədri Rəşad Məcid uşaqların informasiya təhlükəsizliyi məsələsinin mühüm məqamlarına toxunub, əsas tənzimləyici vasitənin filtr proqramları və valideyn məsuliyyəti olduğunu bildirib. O, Dövlət Komitəsi tərəfindən hazırlanmış hesabatı, eləcə də qadın və uşaq mövzularının mediada işıqlandırılması prinsiplərini özündə əks etdirən tövsiyələri yüksək qiymətləndirib, gələcəkdə bu sahədə birgə əməkdaşlıq təkliflərini irəli sürüb.
“ARB Günəş” televiziyasının rəhbəri Məhsim Məhsimov, “Azərbaycan Nəşriyyatları Assosiasiyası” İB-nin sədri Şəmil Sadiq, “Regional Sosial-İqtisadi İnkişaf üzrə Maarifləndirmə” İctimai Birliyinin rəhbəri, İctimai şura üzvü Elnarə Məhərrəmova, “Demokratik Cəmiyyət və Qadın Hüquqlarının Müdafiəsi” İB-nin sədri Mehriban Abdullayeva, “Qadın və Uşaqların İnnovativ Maarifləndirilməsinə Dəstək” İB-nin sədri Aynur Zülfüqarova, “Uşaq Səfirlər Məclisinin üzvü Ayan Əhmədova, psixoloq Elmira Mirzəyeva çıxış edərək, bu sahədə mümkün həll yolları ilə bağlı təklif və fikirlərini səsləndiriblər.
Bölmənin digər xəbərləri
