Uşaqların sağlamlığı naminə sosial layihəyə başlanılıb
Bakı, 2 mart, AZƏRTAC
Azercell Telekom MMC və Respublika Müalicəvi Diaqnostika Mərkəzi (RMDM) tərəfindən uşaqların sağlamlığının qorunması istiqamətində birgə sosial layihəyə həyata keçirilməyə başlanılıb.
AZƏRTAC xəbər verir ki, layihə çərçivəsində hepatit B, C, C-reaktiv zülal, QİÇS kimi xəstəliklərin təyin edilməsi məqsədilə Azercell-in Mobil Klinikasında RMDM-in peşəkar tibb heyəti tərəfindən “SOS Uşaq Kəndləri - Azərbaycan” Assosiasiyasında məskunlaşan uşaqlardan qan analizləri götürülüb və müayinələrin cavabı Azercell Telekom MMC-nin xətti ilə himayəçi valideynlərin mobil telefonlarına, eləcə də müəssisənin direktoruna göndərilib.
Məlumatlar Azercell Telekom MMC tərəfindən avtomatlaşdırılmış texnologiyada tam məxfi olaraq arxivləşdirilib. Layihənin gələcəkdə daha geniş sosial qruplarda reallaşdırılması nəzərdə tutulur.
Pilot xarakter daşıyan layihənin həyata keçirilməsində məqsəd uşaqların sağlamlığı sahəsində keyfiyyətli tibbi xidmət göstərmək və gələcəkdə yarana biləcək xəstəliklərin erkən aşkarlanmasını təmin etməklə uşaqları qorumaqdır. Sosial layihənin Respublika Müalicəvi Diaqnostika Mərkəzi ilə birgə həyata keçirilməsi RMDM-in Bakıda ən yüksək beynəlxalq tibbi standartlara cavab verən JCI (Joint Commission International) akkreditasiyasından keçən yeganə tibb müəssisəsi olması və burada müasir, ən yaxşı avtomatik analizatorlarla təchiz olunmuş, yüksək dərəcəli sertifikat almış laboratoriyanın fəaliyyət göstərməsidir.
Bölmənin digər xəbərləri
