Vasif Qurbanzadə: Oxucuya düşündürücü və ona mənəvi dəyər qazandıran kitablar təqdim etməliyik
Bakı, 2 oktyabr, AZƏRTAC
Azərbaycanda kitab oxuma mədəniyyətinin inkişafı ilə bağlı dövlət tərəfindən məqsədyönlü addımlar atılır. Gündən-günə kitab alanların sayı çoxalır, oxucuların diqqətini cəlb etmək üçün müxtəlif təşəbbüslər həyata keçirilir. Ölkəmizdə parklarda, ictimai nəqliyyatda kitab oxuyan insanlara rast gəlmək mümkündür. Eyni zamanda, regionlarda, məktəblərdə mütəmadi olaraq kitab tədbirləri təşkil olunur ki, bu da əhalinin, xüsusilə gənclərin kitaba marağını artırır.
Bunu AZƏRTAC-a açıqlamasında XI Bakı Beynəlxalq Kitab Sərgisində iştirak edən Mədəniyyət Nazirliyinin Kitab sənayesi şöbəsinin müdiri, yazıçı-publisist Vasif Qurbanzadə deyib.
“Bəzən kitaba marağın az olduğu iddia edilir, lakin mən bununla razılaşmıram. Kitaba maraq var - sadəcə, biz oxunaqlı, düşündürücü və oxucuya mənəvi dəyər qazandıran kitablar təqdim etməliyik. Oxucunu cəlb edəcək əsərlər seçməli, onları nəşr etməli, paylaşmalı, hətta hədiyyə verməliyik. Hər il təşkil olunan Bakı Beynəlxalq Kitab Sərgisi göstərir ki, insanlarımız doğrudan da kitaba maraq göstərir. Bu, Azərbaycan insanının intellektual səviyyəsinin və ədəbi dəyərlərə bağlılığının bariz nümunəsidir. Biz azərbaycanlılar, ədəbi düşüncəyə malik, zəngin mənəvi dəyərlərə sahib bir xalqıq”, - deyə Vasif Qurbanzadə qeyd edib.
Bölmənin digər xəbərləri
