Bakı, 28 sentyabr, AZƏRTAC

Azərbaycan xalqı Vətən müharibəsinin başlamasının ilk ildönümünü yaşayır. Qarabağ uğrunda 44 gün davam edən Haqq savaşımız Azərbaycanın qeyd-şərtsiz qələbəsi ilə başa çatdı. Bu qələbənin arxasında isə bir neçə faktor durur. Əvvəla, o vurğulanmalıdır ki, Azərbaycan maliyyə və insan resursları baxımından Ermənistan üzərində çox əhəmiyyətli bir üstünlüyə malik idi. Belə ki, erməni rəsmi şəxslərinin elə özlərinə istinadən desək illər ərzində ermənilər eyforiyaya qapılaraq, məğlubedilməz erməni ordusu xəyallarına özlərini inandırıb, işləri-gücləri dövlət büdcəsini talamaq, yunan adalarında torpaq almaqdan ibarət idi. Bu, məsələnin materialist tərəfi olsun. Lakin bir də məsələnin mənəvi tərəfi var ki, bu da torpaq sevdası, Vətən qübarıdır. Ermənidə bu yox idi, axı olsa idi illər ərzində bir daş üstünə daş qoyardılar. Axı insan özünə aid olanı nə yıxmaz, nə dağıtmaz, nə də başqa əllərə yar etməz. Erməni də insandır. Necə insandır, təbii ki, bu diskussiyaya açıq mövzu olsa da, bizim üçün cavabını illər, əsrlər ərzində törətdikləri caniliklərlə, vəhşiliklərlə artıqlaması ilə özləri veriblər. Təəssüf, ona görə insan kimi ifadə edildi ki, insan sevdası üçün yuxarıda sadalanan heç bir fakta zərrə qədər olsa belə əsas verməz.

Bu fikirləri politoloq Şəbnəm Həsənovanın “Vətən sevdası ilə dolu 44 gün...” sərlövhəli məqaləsində yer alıb.

Məqalədə, həmçinin deyilir: “İnsan Vətənini, özünə aid olanı nə yıxmaz, nə dağıtmaz. Əksinə, sevər, bəsləyər, əzizləyər... Axı torpaq qanla sulanmış, əl zəhməti ilə yoğrulmuş Tanrının insana bəxş etdiyi nemətlərdən biridir. Bütün dünyanı və bəşəriyyəti ağuşuna alan xəstəliklər qarşısında insan dərk etdi ki, sağlamlıq hər şeydən önəmlidir, can hər şeydən şirindir... 44 gündə isə Azərbaycan xalqı bu stereotiplərin hamısını sındırdı, yerlə bir etdi. Sübut etdi ki, insan üçün ən ali nemət torpaqdır. Üzərində gəzmək sevdası ilə yanıb-tutuşduğun torpaq üçün o şirin candan da gözünü qırpmadan keçirsən. Azərbaycan qadını illər ərzində oğlunu belə böyütdü. Erməni qadını müharibə zamanı əlinə silah alıb, keçirdiyi şou xarakterli təlimlərlə bütün dünyanın gülüş obyektinə çevrilərək ikrah hissi ilə qarşılanarkən Azərbaycan qadını, xanım ismətinin ən gözəl, ən incə nümunəsi olan ölkəmizin birinci xanımı Mehriban Əliyeva müharibə ərzində xalqa verdiyi mesajlarla hər bir şəhid övladını öz övladı bildi, şəhid analarını dərin sevgi ilə o geniş ürəyinə, sinəsinə basdı, bütün dünyaya sülh göyərçinləri göndərdi və bununla da bütün dünyanın rəğbətini qazandı. Ən önəmlisi isə göstərdi ki, Azərbaycan qadını Azərbaycan kişisi qədər mərddir, insandır, qürurlu və məğrurdur. Bəli, sevda dedik, söhbət Vətən və torpaq sevdasından gedir. Erməninin olmayan Vətəndən, ermənidə olmayan sevdadan… Əgər bir qarış torpaq belə ermənin olsa idi illər ərzində olmayan soyqırımı əllərində bayraq etdikləri kimi o torpaqları da bədəvi ərəblərin səhralığına çevirməzdilər. Ola bilər ki, ermənilər maliyyə və insan resursları baxımından qat-qat aşağı idilər, lakin, görünür, bunlar hələ də Azərbaycan qələbəsinin əsas amilləri deyildi. Ermənistanda fərarilik baş alıb gedirdi, amma bizim mərd oğullarımız cəbhə bölgəsinə yola düşmək üçün növbələrə düzülürdülər... Azərbaycan gəncləri o qədər böyük Vətən sevdası ilə döyüş meydanına yollanırdılar ki, heç ehtiyac da olmadı ki, ölkədə tam səfərbərlik elan olunsun. Ən önəmli məsələ azərbaycanlıların mənəvi cəhətdən torpaq sevdasıdırsa, konkret olaraq isə Azərbaycanda vahid dövlət idarəçiliyi strukturunun olması idi. Bunun da tək bir səbəbi var. Ermənistan illər ərzində məlum ağalarının, naməlum ata-analarının, kiçik qardaş olaraq böyük, amma onlardan daha həyasız bacılarının ağzından nə cür avazın çıxmasını gözləyib, havadarlarının nəfəsi bir balaca üzərlərində soyuyandan bəri bir ağlı başında dövlət adamı belə ortaya çıxara bilmədilər. Azərbaycan xalqı isə tariximizin ən parlaq şəxsiyyəti olan Ümummilli lider Heydər Əliyevi və onun siyasi xəttini mükəmməl şəkildə realizə edən Müzəffər Ali Baş Komandan İlham Əliyevi yetişdirdi”.

Politoloq bildirir ki, məhz ulu öndər Heydər Əliyev tərəfindən qurulan vahid dövlət idarəçiliyi sistemi 18 il ərzində Prezident İlham Əliyev tərəfindən daha da mükəmməlləşdirildi. Azərbaycan sanki küllərindən yenidən doğdu... Heç şübhəsiz, vahid dövlət idarəçiliyi dediyimiz zaman bunun əsas bünövrəsində xalq dəstəyidir. Hər bir dövlət adamı dövlətinə illərlə xidmət edə bilər, lakin xalqına həlledici və taleyüklü zamanda lazım olmaq, bunun müqabilində sinəsini sözün həqiqi və məcazi mənasında güllə önünə, təhdid və təzyiq hədəfinə açmaq üçün də təkcə sonradan əldə olunan savad və dərin bilik deyil, təbiətin və Yaradanın sənə bəxş etdiyi şəxsi keyfiyyətlər də olmalıdır. Cənab Prezident İlham Əliyev bütün bu keyfiyyətlərə malik dövlət idarəçisidir. Məhz bu səbəbdən də xalq onu illər ərzində sorğu-sualsız, qeyd-şərtsiz dəstəklədi... Mürəkkəb coğrafi şəraitdə yəni, kəsişən siyasi maraqların tən ortasında yerləşən Azərbaycan kimi bir dövləti idarə etmək, 44 gün ərzində “mən xalqımdan heç nəyi gizlətmirəm, bizə qarşı böyük təzyiqlər var” deyərək ölkə başçımızın özünün də xalqa hər müraciətində çatdırdığı kimi O, təzyiqlərə sinə gərdi. Bu duruş mərd duruş idi. Yalanın, haqsızlığın, ədalətsizliyin gözünün içinə dimdik baxmaq, doğrunun, haqqın və adilin yanında dimdik dayanmaq kimi. Bəli, Müzəffər Ali Baş Komandan İlham Əliyev bir tərəfdən xalqının ümidlərini doğruldur, digər tərəfdən elə özünün də ifadə etdiyi kimi hər bir sadə vətəndaş kimi onun da ürəyində arzuları var idi, məhz oğul kimi ata vəsiyyətini yerinə yetirmək. Bu gün biz məhz bu faktorlara görə fəxr və qürurla deyirik ki, indi Ümummilli lider Heydər Əliyevin də, bütün şəhidlərimizin də ruhu şaddır. Hələ SSRİ dövründə müxtəlif səviyyələrdə və fərqli yollarla Azərbaycanı siyasi səhnədən sıxışdırıb çıxarmağa, Azərbaycan xalqını əzməyə cəhdlər göstərilsə də, ümummilli lider Heydər Əliyev heç zaman bu ədalətsizliklə barışmadı... 1993-cü ildə xalqın təkidli tələbi ilə yenidən hakimiyyətə gəldiyi zaman real mənzərəni aydın görən dahi şəxsiyyət ilk olaraq iqtisadiyyatımızı qaldırmağa istiqamətlənmiş “Əsrin müqaviləsi”ni reallaşdırdı. Elə bu notlar üzərində qurulan siyasi xətti əsas götürən cənab Prezident İlham Əliyev hər şeydən öncə iqtisadi baxımdan güclü olmağın əhəmiyyətini vurğulayırdı, əsas vurğunu məhz bu məsələyə edirdi. Ordu quruculuğunu əsas tutan Azərbaycan tam döyüş qabiliyyətli bir ordu yaratdı. Bu baxımdan da Azərbaycanın əsgər və zabitləri Vətən müharibəsi zamanı hərbi əməliyyatlar aparmaq motivləri baxımından heç bir halda erməni əsgərlərinə nəfəs almağa belə aman vermədilər.

Ş.Həsənova yazıda bildirir: “Ölkələrin və xalqların tarixində elə bir gün, məqam olur ki, həmin zaman özündən sonra gələcək bütün günlər, aylar, illər üçün yeni və nurlu başlanğıcların müjdəçisi olur. Azərbaycan xalqı da 44 günlük Vətən savaşında yenidən doğdu və doğuldu. Qanı torpağa qarışan hər bir mərd oğlumuzun dünyaya gələn yeni körpələrinin səsi, nəfəsi bu Vətən torpaqlarına qarışdıqca bizə bu torpaqlar üstündə qürurla və bir o qədər də çiyinlərimizdə məsuliyyətlə gəzməyimiz üçün stimul verdi… Məhz o şəhidlərin sayəsində biz artıq bundan sonra torpaqlarımızın işğal tarixini yox, azad edilməsini qeyd edəcəyik. Bu tarixlərin hər biri qalib Azərbaycan xalqının tarixində, indiki və gələcək nəsillərin yaddaşında əbədi qalacaqdır. Müzəffər Ali Baş Komandan İlham Əliyevin də haqlı olaraq böyük bir qürurla qeyd etdiyi kimi Şuşanın işğaldan azad edilməsi böyük qəhrəmanlıq, peşəkarlıq, milli ruh tələb edirdi. Azərbaycan hərbçiləri bütün bu ülvi xüsusiyyətləri nümayiş etdirdi. Bütün çətinliklərə baxmayaraq “alınmaz qala” hesab edilən Şuşa alındı. Öz dırnaqarası əməliyyatlarına “dağlarda toy” adı qoyaraq heç bir hərbi əməliyyat keçirmədən Şuşanı işğal edən ermənilərə dağlarda toy tutan, ulu öndər Heydər Əliyev məktəbinin, İlham Əliyev idarəçiliyinin yetirmələri olan gənclərimizdir. Qəhrəman Azərbaycan övladları mükəmməl hərbi əməliyyat keçirərək cəsarət, rəşadət, qəhrəmanlıq, güc, milli ruh nümayiş etdirərək Vətən sevgisi ilə Şuşanı işğalçılardan azad etdilər və uzun fasilədən sonra noyabrın 8-də Şuşada Azərbaycan bayrağını qaldırdılar. O gənclər ki, hər bir şəhərin, kəndin, bir qarış torpağın alınmasını özü üçün dünyalara bədəl xoşbəxtlik sayırdı…”

Qeyd olunur ki, vaxtilə Bakıda möhtəşəm Dövlət Bayrağı Meydanının açılışındakı çıxışında Prezident İlham Əliyev demişdir: “Gün gələcək və Azərbaycan bayrağı işğal edilmiş torpaqlarda, o cümlədən Şuşada qaldırılacaqdır”. Sözünün imzası qədər dəyərli olan cənab Prezident İlham Əliyev bu vədinə də əməl edərək öz xalqının ümidlərin doğrultdu, qürurlu və məğrur Azərbaycan xalqının sevgisini əbədi olaraq qazandı. İndi bütün dünya bizi qürurlu, məğrur, məğlubedilməz xalq kimi tanıyır. Döyüş meydanında Müzəffər Ali Baş Komandan, diplomatiya masasında mahir və məharətli diplomat olan İlham Əliyev cənablarının timsalında bu sübut olundu. Ümumilikdə isə Azərbaycanın timsalında bunu bütün dünya gördü.

Gənclərimizin məhz vətənpərvərlik ruhunda tərbiyə alması, düşmənə nifrət hissi bizi Qələbəyə apardı və Azərbaycan tarixi ədaləti bərpa etdi. Qələbəmizin rəmzi təsadüfən yumruq seçilməyib. Gənc nəsil, yaşlı nəsil, təcrübəli insanlar, bütün xalqımız, bütün etnik qrupların nümayəndələri, bütün dinlərin nümayəndələri bir yumruq kimi birləşib. Bu yumruq, həm gücdür, həm birlikdir. Bu birlik, güc bundan sonra daha da güclü olacaq. Birliyi olan, iradəli, heç nəyə baxmayan, heç kimdən çəkinməyən, milli maraqları müdafiə edən liderə malik olan ölkələr qələbə qazanırlar. 18 ildir ki, Prezident İlham Əliyev Azərbaycanın rəhbəridir, bu illər ərzində Azərbaycanda yetişən vətənpərvər, güclü, milli ruhda tərbiyə almış gənc nəsil bu torpaqları azad etdilər. Düzdür, bütün nəsillərdən olan vətəndaşların bu Qələbədə böyük zəhməti, payı var. Ancaq əsas yükü, əsas vəzifəni gənc nəsil yerinə yetirdi. Atəşkəsin gecə ərzində, gün ərzində pozulması xəbərinə oyanan uşaqlıq, gənclik ayağa durdu və yetər artıq deyərək ədaləti bərpa etdi. Azərbaycan gəncinin tarixi unutmamaq kimi bir xüsusiyyəti var, həm də xalqımızın mərhəməti var, axı həm də mərhəmət türkün qanında var, ermənidə isə yoxdur, çünki quyuları qurudur, quyuya su tökməklə isə quyu dolmaz. Bu gün Azərbaycan qalib xalq olaraq yenə sülh təklif edir Ermənistana. Həm suçlu, həm güclü, ya məqsədli şəkildə guya güclü edilməyə çalışılan Ermənistan gec-tez düz yolu tutmağa məcbur olacaq. Azərbaycanın beynəlxalq hüquqa istinadla özünümüdafiə hüququndan istifadə edərək Qarabağı işğaldan azad etməsi nəticəsində yaranan yeni geosiyasi reallıqla hər kəs barışmalıdır. Bölgədə erməni təəssübkeşliyi çəkən məqsədli qruplaşmalar əllərində kifayət qədər təzyiq vasitəsi olduğu halda ermənin başını tumarlamaq adətlərindən əl çəkməlidirlər. Əsirlər boyu mövcud olan Azərbaycan dövlətlərinin heç biri heç zaman qonşu dövlətə qarşı ərazi iddiası etməyib. Müstəqil Azərbaycan dövləti də heç bir zaman bu mənfi tendensiya ilə getməməklə, qalib olaraq sülh təklif etməklə nə qədər qurucu, sülhsevər bir dövlət və xalq olduğunu dünyaya sübut etdi. Müasir zamanda bu dövlət bir də dünyaya onu sübut etdi ki, ləyaqətli mübarizə necə aparılır, haqq necə zəfər çalır, ədalət necə bərpa edilir.

“Vardenis” yox, Basarkeçər, “Yerasx” deyil, Arazdəyən! Kimdir haqq savaşının qalibi? Azərbaycan! Kimdir qalib? Müzəffər Ali Baş Komandan İlham Əliyev! Kimindir Qarabağ? Qarabağ Azərbaycandır! Şərqi Zəngəzur Azərbaycandır! Azərbaycan isə öz mövqeyində prinsipialdır! Bu dövləti bizə miras qoyan ümummilli lider Heydər Əliyevin də, qəhrəman əsgər və zabitlərimizin də ruhu indi şaddır...