VII Uşaq Paralimpiya İdman Oyunlarının qalibləri mükafatlandırılıb - YENİLƏNİB
Sumqayıt, 23 dekabr, Ətrabə Rzayeva, AZƏRTAC
Sumqayıtdakı Paralimpiya Kompleksində VII Uşaq Paralimpiya İdman Oyunları çərçivəsində ölkənin müxtəlif regionlarından 18 yaşadək olan 120 gənc paralimpiyaçı qalib adı uğrunda mübarizə aparıb.
Yarışın açılış mərasimində gənclər və idman naziri Fərid Qayıbov, Azərbaycan Milli Paralimpiya Komitəsinin prezidenti Hidayət Abdullayev, digər hökumət və qeyri-hökumət nümayəndələri, idman ictimaiyyətinin üzvləri iştirak ediblər.
AZƏRTAC xəbər verir ki, çıxış edənlər ötən əsrin 90-cı illərində Ulu Öndər Heydər Əliyevin təşəbbüsü və xeyir-duası ilə formalaşan milli paralimpiya hərəkatının ötən dövrdə inkişafından danışıblar.
Prezident İlham Əliyevin Azərbaycan idmanının, o cümlədən paralimpiyamızın inkişafına xüsusi diqqət və qayğısı nəticəsində idmançılarımızın, həmçinin paralimpiyaçılarımızın tarixi qələbələr əldə etdiyi vurğulanıb. Uşaq paralimpiyaçılarımızın da bu idman nailiyyətlərini uğurla davam etdirmək əzminə malik olduğu qeyd olunub.
VII Uşaq Paralimpiya İdman Oyunlarının da ölkəmizdə uşaq paralimpiya hərəkatının inkişafı, əlilliyi olan uşaqların idmana marağının artırılması baxımından xüsusi önəmi diqqətə çatdırılıb, yarış iştirakçılarına uğurlar arzu edilib.
Sonra yarışa start verilib.
Gərgin və maraqlı idman mübarizəsi şəraitində keçən yarışlarda 93 idmançı azarkeşlərin alqışları altında qaliblər kürsüsünə qalxıb. Onlara medallar təqdim olunub.
10:14
Dekabrın 23-də Sumqayıtdakı Paralimpiya Kompleksində VII Uşaq Paralimpiya İdman Oyunları start götürüb. Milli Paralimpiya Komitəsinin təşkilatçılığı, BMT-nin Uşaq Fondunun (UNICEF) Azərbaycan nümayəndəliyinin və “Azercell Telekom” MMC-nin, Əmək və Əhalinin Sosial Müdafiəsi, Gənclər və İdman nazirliklərinin dəstəyi ilə reallaşan yarışda ölkənin müxtəlif regionlarından 120 gənc paralimpiyaçı mübarizəyə qatılıb. 2015-ci ildən başlayaraq hər il ənənəvi olaraq təşkil edilən Uşaq Paralimpiya İdman Oyunları bu dəfə 5 idman növü üzrə keçirilir. Belə ki, 18 yaşınadək fiziki və əqli, o cümlədən hərəkət, amputasiya, görmə məhdudiyyəti və beyin iflici olan idmançıların iştirak etdiyi bu Oyunlarda paracüdo, stolüstü tennis, para-taekvondo, para-üzgüçülük, para-pauerliftinq idman növlərində medallar uğrunda mübarizə aparılır.
AZƏRTAC xəbər verir ki, oyunların açılış mərasimi Ümummilli Lider Heydər Əliyevin və şəhidlərin xatirəsinin bir dəqiqəlik sükutla yad edilməsi ilə başlayıb. Azərbaycanın Dövlət Himni səslənib.
Azərbaycan Respublikası Milli Paralimpiya Komitəsinin nəzdində Uşaq Paralimpiya Komitəsi 2013-cü ildə “Azercell Telekom” MMC və UNICEF-in Azərbaycandakı nümayəndəliyinin dəstəyi ilə yaradılıb. Dünyada ilk dəfə yaradılan bu Komitə, bədən tərbiyəsi və idman növlərinin inklüziv olaraq inkişaf etdirilməsini, əlilliyi olan uşaqların rəqabətqabiliyyətli idman növlərinə cəlb edilməsini, həmçinin onların reabilitasiyası və inkişafı, cəmiyyətə inteqrasiya imkanlarının genişləndirilməsini hədəfləyir.
Bölmənin digər xəbərləri
