Roma, 15 avqust, AZƏRTAC

İtaliyanın Siciliya adasındakı Etna vulkanında müşahidə olunan fəallıq səbəbindən Kataniya şəhərinin “Fontanarossa” hava limanında uçuşlar ləğv edilib.

AZƏRTAC xəbər verir ki, vulkanik kül dumanı aeroportun uçuş-enmə zolağını yararsız hala salıb.

Kataniya hava limanını idarə edən SAC şirkəti aeroportun avqustun 15-i axşam saatlarına qədər bağlı olacağı barədə sərnişinləri məlumatlandırıb. Bildirilib ki, uçuş-enmə infrastrukturları yararlı vəziyyətə gətirildikdən sonra əməliyyatlar bərpa olunacaq.

Hündürlüyü təxminən 3330 metr olan Etna Avropanın ən aktiv vulkanıdır. Etnada son aylarda vulkanik aktivlik müşahidə edilir.

Nihad Budaqov

AZƏRTAC-ın xüsusi müxbiri

Roma