XALQ ŞAİRİ VAQİF SƏMƏDOĞLUNA
Sizi – xalqımızın tanınmış şairini 65 illik yubileyiniz münasibətilə ürəkdən təbrik edirəm.
Siz 60-70-ci illərdə ədəbiyyatımıza yeni ab-hava gətirmiş sənətkarlar nəslinin layiqli nümayəndələrindən birisiniz. Müasir insanın mənəvi aləmini, onun dünya və zaman haqqında düşüncə və axtarışlarını əks etdirən əsərləriniz sənətsevərlər tərəfindən həmişə maraqla qarşılanmışdır. Şerlərinizə bir çox musiqi əsərlərinin yazılması sübut edir ki, böyük şairimiz Səməd Vurğunun ədəbi varisi kimi Siz dilimizin tükənməz poetik imkanlarından məharətlə bəhrələnmiş, gözəl sənət nümunələri yarada bilmisiniz.
Sizin ictimai fəaliyyətiniz ədəbi-bədii əsərlərinizdəki fikir və düşüncələrin əməli surətdə gerçəkləşməsinin parlaq nümunəsidir. Əminəm ki, Siz müstəqil Azərbaycan Respublikasının hərtərəfli inkişafı yollarında bundan sonra da öz bilik və bacarığınızı əsirgəməyəcəksiniz.
Sizə uzun ömür, cansağlığı və yeni yaradıcılıq uğurları arzulayıram.
İlham Əliyev
Azərbaycan Respublikasının Prezidenti
Bakı şəhəri, 5 iyun 2004-cü il
Bölmənin digər xəbərləri
