Bakı, 1 avqust, AZƏRTAC

AZƏRTAC müasir müstəqil Azərbaycan dövlətinin banisi, görkəmli siyasi və dövlət xadimi Heydər Əliyevin 100 illik yubileyi ilə əlaqədar xalqımızın Ulu Öndərinin parlaq, zəngin və şərəfli həyat yolunun əsas məqamlarını, bənzərsiz siyasi və dövlətçilik fəaliyyətini - xalqa bağışlanmış ömrünün anlarını xronoloji ardıcıllıqla təqdim edir.

1 iyun. Prezident Heydər Əliyev Minskdə MDB dövlət başçılarının iclasında iştirak etdi.

5 iyun. VIII Beynəlxalq Xəzər Neft-Qaz Sərgisinin və konfransının açılışında nitq söylədi.

6-7 iyun. GUÖAM təşkilatlarının üzvü olan ölkələrin dövlət başçılarının Yaltada keçirilən Zirvə görüşündə iştirak etdi, Yalta xartiyasını imzaladı.

10 iyun. “Bakılı oğlanlar” şən və hazırcavablar klubunun konsertində oldu.

20 iyun. Bakı Ali Birləşmiş Komandirlər məktəbində görüş keçirdi.

21 iyun. ATƏT-in Baş katibi Yan Kubisi qəbul etdi.

22 iyun. BP şirkətinin prezidenti Con Braun ilə görüşdü.

Azərbaycan Beynəlxalq Əməliyyat Şirkəti və BP şirkətinin Bakıdakı ofisində üçölçülü vizualizasiya zalının açılış mərasimində iştirak etdi.

25 iyun. Azərbaycan Respublikasının Silahlı Qüvvələri Gününə həsr olunmuş tədbirdə çıxış etdi.

30 iyun. Bakının Mehdiabad qəsəbəsində şəhid ailələri və Qarabağ müharibəsi əlilləri üçün 50 mənzilli binanın istifadəyə verilməsi mərasimində nitq söylədi.

X X X

2001-ci ilin iyun ayında Bakıda VIII Beynəlxalq Xəzər Neft-Qaz Sərgisi və konfransı keçirildi. İyunun 5-də sərgi və konfransın açılış mərasimində çıxış edən Prezident Heydər Əliyev bu tədbirin əhəmiyyətindən danışdı. Qeyd etdi ki, sərgi dünyanın neft və qaz sənayesi ilə məşğul olan şirkətlərin təcrübə mübadiləsini təmin edir, konfransda aparılan müzakirələr çox faydalı olur.

Azərbaycanda Beynəlxalq Xəzər Neft-Qaz Sərgisinin keçirilməsinin təsadüfi olmadığını söyləyən Ulu Öndər bununla bağlı iki məsələyə diqqət çəkdi: “Birincisi, artıq Xəzər hövzəsi özünü böyük neft və qaz ehtiyatlarına malik olan bir bölgə kimi dünyada tanıdıbdır. İkincisi, bu işin başlanğıcını Azərbaycan qoyubdur və təsadüfi deyil ki, bu sərgi də Azərbaycanda başlayıbdır, səkkizinci dəfədir keçirilir və bundan sonra da keçiriləcəkdir”.

Məsələnin ikinci tərəfinə - hasil olan neftin və qazın ixracı məsələsinə toxunan Ulu Öndər Bakı-Supsa və Bakı-Novorossiysk neft kəmərlərinin yaratdığı imkanlardan, yeni kəmər çəkilməsinin vacibliyindən danışaraq dedi: “Ancaq bunlar ilkin neft üçündür. Böyük nefti bu kəmərlər buraxa bilməzlər. Ona görə biz hələ 1994-cü ildə müqaviləni imzalayanda Bakı-Ceyhan, - indi isə biz ona Bakı-Tbilisi-Ceyhan adı vermişik, - neft kəmərinin tikilməsinin zəruri olduğunu həmin o müqavilədə yazmışıq”.

Neft strategiyası çərçivəsində görülmüş işlərdən söz açan Ümummilli Lider konkret faktları diqqətə çatdıraraq qeyd etdi ki, Azərbaycana ardıcıl surətdə təkliflər gəldi. Ötən dövrdə 14 ölkənin neft şirkətləri ilə 21 müqavilə imzalandı. Təxminən 60 milyard dollara qədər ümumi sərmayə qoyulacaq.

Bu fikirlərin səsləndiyi vaxtdan 22 il keçir. Ulu Öndərin qeyd etdiyi kimi, Beynəlxalq Xəzər Neft və Qaz Sərgisi davamlı xarakter alıb. Prezident İlham Əliyev ənənəvi olaraq bu sərgilərin açılış mərasimində iştirak edir və nitq söyləyir. Sərgiyə aparıcı ölkələrin dövlət və hökumət başçılarının təbrikləri ünvanlanır.

Milli hərbçi kadrların yetişdirilməsini daim diqqətdə saxlayan Heydər Əliyev hərbi məktəblərə gedir, tədris prosesi ilə tanış olur, müdavimlərlə görüşür, onlara dəyərli tövsiyələrini verirdi. Belə görüşlərdən biri də 2001-ci il iyunun 20-də Bakı Ali Birləşmiş Komandirlər Məktəbində oldu. Ulu Öndərin orada söylədiyi fikirlər bu günümüz üçün də aktualdır.

Sitat: Özünü hərbi peşəyə həsr edən hər bir gənc anlamalıdır: bu peşəyə özünü nə üçün həsr edir? Çünki hərbi peşə başqa peşələrə nisbətən asan deyil, çətindir. Nə üçün həsr edir? Demək, vətəni qorumaq üçün, öz dövlətini, öz millətini qorumaq üçün! Hesab edirəm ki, hərbi təhsil alıb orduda xidmət etmək istəyən gəncin əsas məqsədi budur. Əgər siz hamınız həqiqətən bu məqsədi nəzərə alaraq özünüzü hərbi peşəyə həsr etmək istəyirsinizsə və hərbi məktəbə daxil olub ali hərbi təhsil almaq, bizim orduda, silahlı qüvvələrdə xidmət etmək istəyirsinizsə, demək, siz sağlam mənəviyyata malik olmalısınız.

Ordu hər bir dövlətin əsas atributlarından sayılır. Xüsusən müharibə vəziyyətində yaşayan, əraziləri işğala məruz qalan ölkə üçün bu, həyati əhəmiyyət kəsb edir. Təsadüfi deyil ki, Prezident Heydər Əliyevin 1998-ci il 22 may tarixli Fərmanı ilə iyunun 26-sı Azərbaycan Respublikasının Silahlı Qüvvələri Günü elan olundu. Ümummilli Lider Silahlı Qüvvələr Günü münasibətilə keçirilən tədbirlərdə iştirak edir, ordu quruculuğu sahəsində görülən işlərdən, qarşıda duran vəzifələrdən danışırdı. 2001-ci il iyunun 25-də keçirilən tədbir də bu baxımdan xarakterikdir. Heydər Əliyevin hakimiyyətə qayıdışından ötən səkkiz ildə Azərbaycan dövlətinin müstəqilliyini qorumağa və möhkəmləndirməyə qadir olan güclü ordu formalaşmışdı. Ulu Öndər Silahlı Qüvvələr Günündə bu və digər uğurlardan, həmçinin ordu quruculuğunun çətinliyindən, hər bir əsgərə, zabitə öz biliyini, bacarığını nümayiş etdirmək üçün imkan yaradılmasının vacibliyindən bəhs etdi.

X X X

Heydər Əliyevin Azərbaycan Silahlı Qüvvələri Gününə həsr olunmuş mərasimdəki nitqindən

• Hər bir dövlətin ordusu onun əsas sütunlarından biridir. Deyə bilərəm ki, bəlkə də, onurğa sütunudur. Ordu tarixən həmişə dövlət üçün, xalq, millət üçün ən əziz anlayış olmuşdur. Bu, indi müstəqil Azərbaycan dövlətində də belədir.

• Müstəqil Azərbaycan dövlətinin ona layiq, onun müstəqilliyini qorumağa və möhkəmləndirməyə qadir olan güclü ordusu var.

• Azərbaycan xalqı, onun yaratdığı dövlət, onun yaratdığı silahlı qüvvələr böyük sınaqlardan, çətinliklərdən keçərək, böyük itkilər verərək Azərbaycanın dövlət müstəqilliyini ilbəil yaşadıb, möhkəmləndirib, inkişaf etdirib və artıq indi dönməz vəziyyətə gətirib çıxarıbdır.

• Sevindirici hal ondan ibarətdir ki, indi özünü hərbi peşəyə həsr etmək istəyən gənclər ilbəil artır. Mən bunu xüsusi qeyd etmək istəyirəm ona görə ki, vaxtilə biz müstəqil olmadığımız zaman, sovet hakimiyyəti dövründə Azərbaycan gənclərinin içərisində özünü hərbi peşəyə həsr etmək istəyənlər az idi. Bəlkə də bunun obyektiv səbəbləri var idi. Çünki gənclər böyük sovet ordusunda xidməti, yaxud orada uzunmüddətli xidməti sevmirdilər, ya da başqa sənətləri bundan üstün tuturdular.

• Ordu yaratmaq, qurmaq asan bir şey deyildir. Əgər nəzərə alsaq ki, sovet hakimiyyəti dövründə bizdə bunun əsası olmayıbdır, bu asan bir şey deyildir. Ona görə də ordunun, silahlı qüvvələrin yaranmasına, ordu quruculuğuna dövlətin, bütün hakimiyyət orqanlarının xüsusi qayğısı olmalıdır. Azərbaycanın dövləti, Azərbaycanın Prezidenti, Ali Baş Komandan bu qayğını göstərir və bundan sonra da göstərəcəkdir.

• Elə etməliyik ki, orduda hər bir əsgərin, hər bir zabitin öz biliyini, bacarığını, gücünü, vətənpərvərliyini nümayiş etdirmək üçün həqiqətən imkanları olsun. Ona görə də biz bu sahədə olan nöqsanları da qeyd etməliyik. Onların aradan qaldırılması ilə də məşğul olmalıyıq.

• Ordunun ordu olmasının əsas amili nizam-intizamdır. Hər bir sahədə nizam-intizam ordudakı kimi vacib, əhəmiyyətli deyildir. Ona görə də ciddi nizam-intizam, hərbi nizamnamənin tam yerinə yetirilməsi vacibdir.

• Dövlət xalqındır, xalq üçündür, millət üçündür. Ordu xalqındır və ordu xalq üçündür, dövlət üçündür, millət üçündür. Güman edirəm ki, bu anlayışlar heç vaxt unudulmayacaqdır.