Xalqın mədəni irsini məhv etməyə və saxtalaşdırmağa yönəlmiş fəaliyyət bütün bəşəri mədəniyyətə təcavüzdür
Bakı, 6 noyabr, AZƏRTAC
Bu gün Prezident İlham Əliyevin apardığı müdrik siyasət sayəsində Azərbaycanın ərazi bütövlüyü təmin edilir. Bununla demək olar ki, dövlətimizin başçısı beynəlxalq təşkilatların qərarlarını təkbaşına icra edir. Əminəm ki, aparılan bu haqlı, strateji və məntiqli siyasət həm də region xalqlarına sülh və əmin-amanlıq gətirəcək. Prezident İlham Əliyevə olan inam xalqımızda milli həmrəylik yaradıb. Hamı çox böyük qürur hissi və səbirsizliklə Müzəffər Ali Baş Komandanın çıxışlarını və qələbə sevincli xəbərlərini gözləyir. Dövlətimizin başçısı xarici mediaya verdiyi müsahibələrdə Azərbaycanın real həqiqətlərini dünya ictimaiyyətinə çatdırması və bilavasitə rəhbərliyi ilə həyata keçirilən diplomatiyamızın səyi nəticəsində artıq bəzi beynəlxalq təşkilatlar Ermənistan silahlı qüvvələrinin mülki əhalinin yaşadığı əraziləri ballistik raketlərlə atəş hədəfinə çevirməsini, nəticədə onlarca mülki şəxsin həlak olması, yüzlərlə dinc sakinin yaralanması faktlarını etiraf edirlər. Bu işdə parlament diplomatiyasının da rolu az deyil.
Bu sözləri AZƏRTAC-a açıqlamasında Milli Məclisin Ailə, qadın və uşaq məsələləri komitəsinin sədri Hicran Hüseynova söyləyib.
“Milli Məclisin rəhbərliyi mövcud vəziyyətlə bağlı xarici ölkələrin parlament sədrləri, beynəlxalq təşkilatların nümayəndələri və ölkəmizdə akkreditə olunan səfirlər ilə görüşməklə yanaşı, müvafiq qaydada məktublar göndərib və telefon danışıqları apararaq onları beynəlxalq hüququn ədalətli mövqeyini dəstəkləməyə çağırıb. O cümlədən Milli Məclisin Ailə, qadın və uşaq məsələləri komitəsinin təşəbbüsü ilə beynəlxalq uşaq və qadın təşkilatlarına Gəncədə, Bərdədə və Tərtərdə törədilən terror aktları ilə bağlı müraciətlər göndərilib. Ancaq düşünürəm ki, biz Ermənistanın vandalizm siyasətini faktlarla beynəlxalq təşkilatların diqqətinə çatdırmalıyıq. Belə ki, hazırda işğal altındakı ərazilərimizdə 67 məsciddən 63-ü tam dağıdılıb, 4-ü isə qismən məhv edilib. Yalnız beynəlxalq təşkilatların təzyiqi nəticəsində Ağdamdakı Cümə məscidinin, Aşağı və Yuxarı Gövhərağa məscidlərinin, Şuşadakı Saatlı məscidinin divarları qorunub saxlanılıb. Buna baxmayaraq, bu gün ermənilərin ədəbsizliyinin, azərbaycanlılara və müsəlmanlara nifrətinin təcəssümü olaraq onların içərisində donuz və mal-qara saxlanılır. Eyni zamanda, işğal olunmuş ərazilərdəki çay, göl, kənd və şəhər adları erməniləşdirilib. Erməni vandalizminin əli ilə Şuşada və digər rayonlarda Pənahəli xan tərəfindən tikdirilmiş qala və istehkamlar dağıdılıb, Natəvanın evi qəzalı vəziyyətə düşüb. İşğalçılar abidələri erməni memarlığının nümunələri kimi təqdim etmək məqsədilə xarici görünüşünü dəyişdirib, qədim dini tikililəri dağıdıb”, - deyə deputat qeyd edib.
Hicran Hüseynova bildirib ki, onlar Ağdərə, Laçın və Kəlbəcər rayonlarında alban tikililərinə qarşı da eyni vəhşilikləri törədiblər. Erməni vandalları tərəfindən Azərbaycanın müasir milli heykəltəraşlığının bəhrələndiyi Laçın və Kəlbəcər rayonlarında bir çox qədim heykəllər, daş qoç fiqurlar və atlar məhv edilib. Ermənistan tərəfindən mədəni-dini abidələrimizin məhv edilməsi “Silahlı münaqişə zamanı mədəni sərvətlərin qorunması haqqında” 1954-cü il Haaqa Konvensiyası, “Arxeoloji irsin qorunması haqqında” 1992-ci il Avropa Konvensiyası və “Ümumdünya mədəni və təbii irsinin qorunması haqqında” 1972-ci il UNESCO Konvensiyasının tələblərinə tamamilə ziddir. Ermənistanın Azərbaycan xalqının mədəni irsini məhv etməyə və saxtalaşdırmağa yönəlmiş fəaliyyəti bütün bəşər mədəniyyətinə təcavüzdür. Erməni vandalları bu hərəkətlərinə görə cavab verməli, cəzalandırılmalı və dünya ictimaiyyəti bu faktı diqqətdən kənarda qoymamalıdır.
Bölmənin digər xəbərləri
