Xanlar Fətiyev: Dövlətimizin başçısının sosial inqilab xarakterli qərarları vətəndaşların ürəyincədir
Bakı, 5 mart, AZƏRTAC
Prezident İlham Əliyevin fiziki şəxslərin problemli kreditlərinin həllinə dair imzaladığı Fərman son dərəcə vacib, qətiyyətli bir addımdır. Uzun müddətdir vətəndaşları narahat edən belə bir ciddi problemin həllinə bu cür konstruktiv yanaşma bir daha onu göstərdi ki, dövlətimizin başçısı sıravi vətəndaşların qayğılarına çox həssaslıqla yanaşır və hər zaman onları düşünür.
AZƏRTAC xəbər verir ki, bu fikri jurnalistlərə açıqlamasında Milli Məclisin deputatı Xanlar Fətiyev bildirib.
O deyib: “İmzalanan fərman və sərəncamlar Azərbaycanın, onun vətəndaşlarının rifahının yüksəlməsinə xidmət edir. Dövlətimizin başçısının apardığı məqsədyönlü sosial və iqtisadi inkişaf siyasəti artıq öz bəhrəsini verməkdədir. Azərbaycanın iqtisadi potensialı artdıqca dövlət vətəndaşlar üçün şəraitin yaxşılaşdırılması, onların maddi rifahının yüksəldilməsi ilə bağlı vacib qərarlar qəbul edir. 800 mindən çox insanın probleminə yardımçı ola biləcək bu Fərman da həmin qəbildəndir. Qəbul olunan qərarlar və imzalanan fərman və sərəncamlar vətəndaşlar arasında çox sevinc və coşqu ilə qarşılanır və böyük ruh yüksəkliyi yaradır”.
Deputat qeyd edib ki, Prezident İlham Əliyevin müəyyən etdiyi sosial-iqtisadi strategiya kursu ölkə iqtisadiyyatına yeni stimul verir və bu siyasətin önündə Azərbaycan vətəndaşı amili dayanır.
Bölmənin digər xəbərləri
