XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Martın 13-də Azərbaycan Respublikasının xarici işlər naziri Vilayət Quliyev Hindistanın Azərbaycandakı fövqəladə və səlahiyyətli səfiri Dinkar Xulları qəbul etmişdir.
Görüş zamanı səfir Dinkar Xullar və nazir Vilayət Quliyev Hindistan ilə Azərbaycan arasındakı münasibətlərin möhkəmlənməsinə dair fikir mübadiləsi aparmış, ölkələrimiz arasındakı əlaqələrin daha da səmərəli inkişafı üçün Texniki və İqtisadi əməkdaşlıq proqramı çərcivəsində diplomatiya, informasiya texnologiyaları, menecment, maliyyə və sairə sahələrdə məşğələ kurslarının keçirilməsinin zəruriliyini vurğulamışlar.
Sonra səfir öz ölkəsinin xarici işlər naziri Casvant Sinqhin Hindistanla Azərbaycan arasındakı diplomatik əlaqələrin onuncu ildönümü ilə əlaqədar təbrik məktubunu və Hindistana dəvətini nazir Vilayət Quliyevə çatdırmışdır.
Öz növbəsində nazir Vilayət Quliyev dəvətə görə səfirə minnətdarlığını bildirmiş, Hindistan ilə Azərbaycan arasındakı əlaqələri yüksək qiymətləndirərək, bu əlaqələrin daha da inkişafına tərəfdar olduğunu vurğulamışdır.
Görüşdə qarşılıqlı maraq doğuran bir sıra məsələlər də müzakirə olunmuşdur.
Bölmənin digər xəbərləri
