XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Martın 23-də Azərbaycan Respublikasının xarici işlər naziri Vilayət Quliyev Sloveniya Respublikasının Azərbaycanda yeni akkreditə olunmuş fövqəladə və səlahiyyətli səfiri Andre Qrassellini qəbul etmişdir.
Nazir Vilayət Quliyev səfiri yeni təyinatı ilə təbrik edərək, Azərbaycan ilə Sloveniya arasındakı münasibətlərin genişlənməsinə mühüm əhəmiyyət verdiyini vurğulamışdır. Nazir səfirin bu vəzifədə ikitərəfli əlaqələrin inkişafı üçün diplomatik xidmət sahəsindəki təcrübəsindən istifadə edəcəyinə əmin olduğunu bildirmişdir.
Səfirin xahişi ilə nazir Vilayət Quliyev ölkəmizdə demokratiyanın inkişafı, insan haqlarının müdafiəsi, Ermənistan-Azərbaycan, Dağlıq Qarabağ münaqişəsinin həlli istiqamətində aparılan işlər, ATƏT-in Minsk qrupunun bu istiqamətdə fəaliyyəti və qaçqınların ağır vəziyyəti barədə ətraflı məlumat vermişdir.
Öz növbəsində səfir Andre Qrasselli diplomatik fəaliyyəti dövründə iki ölkə arasında əlaqələrin daha da möhkəmlənməsi və genişlənməsi üçün öz var-qüvvəsini əsirgəməyəcəyini bildirmiş, Dağlıq Qarabağ münaqişəsinə toxunaraq, tezliklə beynəlxalq birliyin birgə səyləri nəticəsində sülh yolu ilə həll edilməsinə ümid etdiyini vurğulamışdır.
Sonra səfir Andre Qrasselli öz etimadnaməsinin surətini nazir Vilayət Quliyevə təqdim etdi.
Bölmənin digər xəbərləri
