Xarici jurnalistlər Qırmızı qəsəbədə olublar
Bakı, 6 mart, AZƏRTAC
Xarici jurnalistlər və bloqerlərdən ibarət qrupun Azərbaycanın bölgələrinə səfərləri davam edir. Onlar Azərbaycanın işğaldan azad olunmuş əraziləri - Füzuli, Şuşa və digər şəhərlərdə olublar.
AZƏRTAC STMEGI saytına istinadla xəbər verir ki, xarici jurnalistlər Qırmızı qəsəbədə də olublar. Onlar burada tarix-mədəniyyət abidləri, Dağ Yəhudiləri Muzeyi və sinaqoqlarla, həmçinin tağlı körpü, keçmiş doğum evinin binası və s. ilə tanış olublar.
Dağ Yəhudiləri Muzeyinin direktor müavini Pesax İsakov qonaqlara dağ yəhudilərinin Qırmızı qəsəbədə məskunlaşması tarixindən bəhs edib. O qeyd edib: “Bu gün Azərbaycanda üç yəhudi icması var. Bunlar aşkenaz, gürcü və dağ yəhudiləridir. Ötən əsrin əvvəlində icmamız ənənəvi yəhudi həyat tərzini qoruyub saxlayıb. Belə ki, dağ yəhudiləri hər gün sinaqoqları ziyarət edir, ibadətlə məşğul olur, evlərin hamısında kaşrutun bütün qaydalarına əməl edilir. Əhalinin siyahıyaalınması göstərir ki, hazırda qəsəbədə 3 minə yaxın yəhudi yaşayır”.
Muzeyin direktoru İqor Şaulov xarici jurnalistləri eksponatlarla tanış edərək bildirib ki, burada məişət əşyaları və artefaktlar toplanıb. O əlavə edib: “Muzeyimizdə arxiv sənədləri və qədim dini kitabların olduğu ayrıca kitabxana da var. Bu mədəniyyət obyektində dağ yəhudilərinin tarixi və mədəniyyəti, keçmişi və müasir həyatına dair eksponatlar nümayiş etdirilir. Onlarla dağ yəhudisi bu mədəniyyət müəssisəsinin açılışdan sonra sənədləri, qədim bəzək əşyalarını, dini məzmun kəsb edən əşyaları muzeyə hədiyyə ediblər. Onların hər biri böyük mədəni-tarixi əhəmiyyətə malikdir”.
Böyük Britaniyanın “The Jewish Chronicle” nəşrinin (dünyanın ən qədim yəhudi qəzeti) jurnalisti Rupert Parker Qırmızı qəsəbəyə səfəri barədə təəssüratlarını STMEQI saytının müxbiri ilə bölüşüb. O qeyd edib: “Mən Londonda yaşayır və işləyirəm. Bu, Azərbaycana ikinci səfərimdir. Ölkənizə ilk dəfə 10 il əvvəl səfər etmişəm. Buraya yenidən gəlmək məni çox sevindirdi. Ziyarət etdiyimiz muzey məndə unudulmaz təəssürat yaratdı. Orada gördüyümü sözlə ifadə etmək çətindir! Çox maraqlı, müasir və geniş məlumatverici bir məkandır. İndi bu, çox aktualdır.
Mən Azərbaycan ərazisində dağ yəhudiləri icmasının tarixi haqqında ətraflı informasiya əldə etdim. Düşünürəm ki, Qırmızı qəsəbə barədə yazacağım məqalə oxucularımın xoşuna gələcək. Onlar da bu məkana gəlmək istəyəcəklər. Yəhudi irsinin qorunub saxlanılması baxımından böyük tarixi-mədəni əhəmiyyəti olan belə möcüzəvi muzeyin yaradılmasında əməyi olanlara təşəkkürümü bildirirəm”.
Bölmənin digər xəbərləri
