Əmək və Əhalinin Sosial Müdafiəsi Nazirliyinin Mərdəkandakı müalicə pansionatının baş həkimi Hümbət Dadaşov
AZƏRTAC-ın müxbirinə bildirmişdir ki, təkcə bu mövsümdə minə qədər Böyük Vətən, Qarabağ, Əfqanıstan müharibələri və Çernobıl əlili, şəhid ailəsinin üzvləri pansionatda müalicə edilmişdir. Zəngin bilik və təcrübəyə malik həkim və tibb bacılarının səyi, naftalan, parafin, yod-bromla və digər müasir müalicə prosedurları yüzlərlə ağır xəstəyə şəfa vermişdir. Müxtəlif konsert və bədii özfəaliyyət kollektivləri tez-tez pansionata gələrək, xəstələrin mədəni istirahətinə öz töhfələrini verirlər.
Mingəçevirdən Şəmşid Məmmədov, Əsəd Əsədzadə, Gəncədən Könül Məmmədova, Qubadan Ağaməhəmməd Qafarov, Lənkərandan Söhrab Sadıqov, Ucardan Sahib Zülfüqarov burada xəstələrə göstərilən diqqət və qayğıdan, yaradılan səliqə-sahmandan razılıqla danışmışlar.
Nazir müavini Natiq Məmmədov bu günlərdə bir qrup mütəxəssislə birlikdə burada olmuşdur. Bu ilin payızında pansionatda təmir işlərinə başlanması qərara alınmışdır.
