XƏTAİ RAYONUNDA 20 YANVAR FACİƏSİNİN İLDÖNÜMÜ İLƏ BAĞLI TƏDBİRLƏR PLANI HAZIRLANMIŞDIR
Bakı, 8 yanvar (AZƏRTAC). Xətai Rayon İcra Hakimiyyəti (RİH) 20 Yanvar faciəsinin iyirminci ildönümü ilə bağlı geniş tədbirlər planı hazırlamışdır.
Bütün idarə, müəssisə və təşkilatlarda xalqımızın qəhrəman övladlarının əziz xatirəsinə həsr olunmuş müxtəlif tədbirlər keçiriləcək, mədəniyyət evlərində və kitabxanalarda faciəyə aid fotosərgilər, məktəblərdə “20 Yanvar Azərbaycan xalqının qəhrəmanlıq salnaməsidir” mövzusunda ədəbi-bədii gecələr və sərgilər təşkil ediləcəkdir.
Yanvarın 19-da RİH-də 20 Yanvar əlilləri və şəhid ailələrinin üzvləri ilə birlikdə anma mərasimi keçiriləcək, onlara humanitar yardım ediləcəkdir. Həmin gün bütün tədris ocaqlarında Qanlı Yanvar faciəsinə həsr olunmuş xüsusi dərs keçiləcəkdir.
Şəhidlərin ruhunu yad etmək məqsədi ilə Əhmədli qəsəbəsinin Cümə məscidində dini mərasim təşkil ediləcəkdir.
Ümumxalq hüzn günü rayon ictimaiyyəti Şəhidlər xiyabanını ziyarət edəcək, matəm əlaməti olaraq dövlət bayraqları endiriləcək, saat 12.00-da şəhidlərin xatirəsi bir dəqiqəlik sükutla yad ediləcəkdir.
Bölmənin digər xəbərləri
