Xəzəryanı ölkələrdə suitilərin ovuna qadağa qoyulacaq
Bakı, 15 noyabr, AZƏRTAC
Müxtəlif mənbələrdən alınan məlumatlara əsasən, keçən əsrin əvvəlində Xəzər suitilərinin sayı təqribən 1 milyona yaxın olub. Lakin böyük britaniyalı alimlərin apardıqları tədqiqat nəticəsində bu rəqəmin 110 minə qədər azaldığı müəyyənləşib. Rusiyanın Xəzər Balıqçılıq Təsərrüfatı İnstitutu isə onların sayının 380 min olduğu barədə məlumat veriblər. Hazırda Xəzər suitilərinin sayı təhlükəli həddə düşüb. Buna səbəb olan amillərdən biri də qidalandığı kilkələrin sayının on üç-on dörd il əvvələ nisbətən 10 dəfə azalmasıdır.
Bu barədə AZƏRTAC-a Ekologiya və Təbii Sərvətlər Nazirliyinin (ETSN) Elmi-Tədqiqat Balıqçılıq Təsərrüfatı İnstitutunun direktoru Mehman Axundov məlumat verib.
Direktor qeyd edib ki, Xəzər suitilərinin adının BMT-nin Vəhşi Heyvanların Miqrasiya edən Növlərinin Qorunması üzrə Konvensiyanın 1 saylı əlavəsinə daxil edilməsi nəticəsində bütün Xəzəryanı ölkələrdə onların ovuna qadağa qoyulacaq. Azərbaycanda 1952-ci ildən etibarən həmin dəniz canlılarının ovlanmadığını vurğulayan M.Axundov suitilərin yalnız Rusiya tərəfindən ovlandığını söyləyib. Belə ki, şimal qonşularımız qış aylarında yeni doğulmuş suiti balalarını ovlayırlar.
İnstitutun direktoru Xəzərin Şah Dili burnunda Xəzər suitiləri üçün dəniz qoruğunun yaradıldığını və 200-ə qədər fərdin mühafizə olunduğu ərazilərə gəldiyini də bildirib.
Bölmənin digər xəbərləri
