XİN: Bölgədə sülh yalnız beynəlxalq hüquqa ciddi riayət edilməsi əsasında təmin oluna bilər
Bakı, 14 sentyabr, AZƏRTAC
Beynəlxalq ictimaiyyətin çağırışlarına və atəşkəs haqqında razılaşmaya baxmayaraq, Ermənistan silahlı qüvvələri sentyabrın 12-dən Azərbaycana qarşı başlatdığı hərbi təxribatları davam etdirir.
AZƏRTAC xəbər verir ki, bu barədə Azərbaycan Respublikası Xarici İşlər Nazirliyinin Mətbuat Xidməti idarəsinin şərhində bildirilib.
Qeyd olunub ki, Azərbaycan Respublikası Müdafiə Nazirliyi məlumat verdiyi kimi, Azərbaycan Ordusu tərəfindən legitim hərbi hədəflərə qarşı cavab tədbirləri həyata keçirilir.
Azərbaycan tərəfi beynəlxalq humanitar hüquqa və humanizmə sadiq qalaraq, ölkəmizin ərazi bütövlüyünə qarşı təxribat törətmiş Ermənistan hərbçilərinin cəsədlərini birtərəfli qaydada Ermənistan tərəfinə təhvil verməyə hazır olduğunu bəyan edib və Beynəlxalq Qırmızı Xaç Komitəsi bu barədə məlumatlandırılıb.
Belə bir vəziyyətdə Ermənistanın təxribatçı əməllərindən əl çəkməməsi və Azərbaycanın mövqelərini artilleriya vasitələrindən atəşə tutması bu ölkənin bölgədəki vəziyyətin gərginləşdirilməsində maraqlı olduğunu göstərir.
“Ermənistanı dağıdıcı fəaliyyətindən çəkinməyə, humanitar atəşkəsə riayət etməyə çağırırıq. Bölgədə sülh yalnız beynəlxalq hüquqa ciddi riayət edilməsi əsasında təmin oluna bilər”, - deyə açıqlamada qeyd olunub.
Bölmənin digər xəbərləri
