Xocalı faciəsi tarixin qara səhifəsinə çevrilib
Bakı, 25 fevral, AZƏRTAC
Təhsil İşçilərinin Peşəkar İnkişafı İnstitutunda “Xocalı - qan yaddaşımız” mövzusunda elmi-praktik konfrans keçirilib.
Əvvəlcə faciə qurbanlarının xatirəsi anılıb.
İnstitutdan AZƏRTAC-a bildiriblər ki, tədbirdə bu təhsil müəssisəsinin direktoru, professor Asəf Zamanov Xocalı faciəsinin başvermə səbəblərindən və ağır nəticələrindən danışıb. Qeyd olunub ki, Xocalı soyqırımı xalqımıza və ümumilikdə bəşəriyyətə qarşı misli görünməmiş cinayətdir.
1992-ci il fevralın 25-dən 26-na keçən gecə mənfur ermənilərin keçmiş sovet ordusunun 366-cı motoatıcı alayının köməyi ilə Xocalıda törətdikləri qanlı hadisələrdən danışan direktor diqqətə çatdırıb ki, bu hadisə zamanı düşmən 613 nəfəri xüsusi amansızlıqla qətlə yetirib, yüzlərlə sakini əsir və girov götürüb. A.Zamanov ümummilli lider Heydər Əliyevin təşəbbüsü ilə Xocalı faciəsinə siyasi-hüquqi qiymət verildiyini bildirib.
Heydər Əliyev Fondunun vitse-prezidenti Leyla Əliyevanın təşəbbüsü ilə reallaşdırılan “Xocalıya ədalət!” beynəlxalq kampaniyası çərçivəsində həyata keçirilən tədbirlərin əhəmiyyəti diqqətə çatdırılıb.
Digər çıxış edənlər də ermənilərin zaman-zaman qanlı faciələr törətdiklərini bildirib, Xocalı soyqırımı barədə həqiqətlərin dünya ictimaiyyətinə çatdırılmasının vacibliyini vurğulayıblar.
Bölmənin digər xəbərləri
