SİYASƏT
XOCALI FACİƏSİ TÜRKİYƏ PARLAMENTİNDƏ MÜZAKİRƏ OLUNDU
Fevralın 27-də Türkiyə Böyük Millət Məclisinin iclasında Xocalı faciəsi ilə əlaqədar məsələ müzakirə olunmuşdur.
Milliyyətçi Hərəkat partiyasının parlamentdəki deputat qrupu sədrinin müavini Məhmət Şandır iclasda çıxış edərək Xocalı faciəsini Azərbaycan xalqına qarşı törədilmiş ən dəhşətli cinayət və erməni vəhşiliyinin əyani təzahürü kimi səciyyələndirdi, bu soyqırımın tanınmasını təklif etdi.
Məhmət Şandır Xocalı faciəsi ilə əlaqədar bütün sənədləri, video lentləri, fotoşəkilləri toplayaraq Birləşmiş Millətlər Təşkilatına, Avropa Birliyinə və Avropa Şurası Parlamentlərarası Assambleyaya göndərməyin vacib olduğunu nəzərə çarpdırdı. Deputat çıxışını “bu talanı və soyqırımını törədən erməniləri lənətləyirəm” sözləri ilə bitirdi.
Məhmət Şandırın çıxışı alqışla qarşılandı.
İclasda Ermənilərin dinc Azərbaycan xalqına qarşı törətdiyi vəhşilikləri əks etdirən sənədlərin toplanması və Xocalı soyqırımının tanınması ilə əlaqədar qərar layihəsinin hazırlanması ücün müvafiq komissiyaya tapşırıqlar verildi.
Tural Rzayev
AZƏRTAC-ın xüsusi müxbiri
Ankara