Xocalı soyqırımı ilə bağlı səyyar sənədli fotosərgi fəaliyyətini İsraildə davam etdirir
Bakı, 15 aprel (AZƏRTAC). Xocalı soyqırımı ilə bağlı səyyar sənədli fotosərgi fəaliyyətini İsrailin Afula şəhərində davam etdirir.
Bu il fevralın 25-də Təl-Əviv Universitetinin nəzdində fəaliyyət göstərən Yəhudi Diaspor Muzeyində Heydər Əliyev Fondunun vitse-prezidenti Leyla xanım Əliyevanın rəhbərlik etdiyi “Xocalıya ədalət!” kampaniyasının və "STMEGİ" Dağ Yəhudilərinin Beynəlxalq Təşkilatının dəstəyi, “Azərbaycan-İsrail” Beynəlxalq Assosiasiyasının (AZİZ) təşkilatçılığı ilə Xocalı soyqırımının 21-ci ildönümünə həsr olunmuş “Xocalıya ədalət!” adlı anma mərasimi və sənədli fotosərgi keçirilmişdir.
İsraildə fəaliyyət göstərən Azərbaycan diasporu tədbirin davamı olaraq yeni fotosərgi təşkil etmişdir. Fotosərgi Afula şəhərinin Mədəniyyət Mərkəzində açılmışdır. Açılışda Afula şəhərinin meri Avi Elkabetz, vitse mer Boris Yudis, ictimai təşkilatların rəhbərləri, diaspor nümayəndələri və kütləvi informasiya vasitələrinin əməkdaşları iştirak etmişlər.
Fotosərgidə Heydər Əliyev Fondunun Xocalı soyqırımı ilə əlaqədar hazırladığı fotostendlər, nəşr etdirdiyi kitablar, broşürlər, audio-video materiallar nümayiş etdirilmişdir. Tədbir iştirakçıları faciəni əks etdirən fotoşəkillərə ürəkağrısı ilə baxmış, günahsız insanlara qarşı ermənilərin törətdikləri vəhşiliklərdən dəhşətə gəlmişlər.
Tədbirin keçirməsində müstəsna rolu olan İsraildəki Azərbaycan Mədəniyyət Mərkəzinin rəhbəri Yeganə Salman çıxış edərək sərginin əhəmiyyətindən danışmışdır. Y.Salman bildirmişdir ki, Ermənistan silahlı qüvvələri və Azərbaycanın Dağlıq Qarabağ ərazisindəki Xankəndi şəhərində yerləşən 366-cı motoatıcı alayın köməyi ilə həyata keçirilən bu soyqırımı nəticəsində yüzlərlə uşaq, qadın, qoca və başqaları vəhşicəsinə qətlə yetirilmişdir. Xocalı şəhərinin işğalı zamanı bir gecədə vəhşi qətliamın qurbanı olan 613 dinc sakindən 63-ü məhz uşaqlar olmuşdur. Günahsız körpələr, yeniyetmələr amansızlıqla, işgəncələrlə öldürülmüş, başları kəsilmiş, gözləri çıxarılmış, dərisi soyulmuş, süngüyə taxılmışdır. Erməni işğalçılarının Xocalıda törətdiyi qanlı cinayət nəticəsində 76 azərbaycanlı uşaq əlil olmuşdur.
Afula şəhərinin meri Avi Elkabetz Xocalı soyqırımına həsr olunmuş fotosərgini yüksək qiymətləndirərək demişdir ki, tarixdə bir neçə belə qəddarlıqla həyata keçirilən soyqırımı olmuşdur. Yəhudilər bu acını yaşamışlar. Bu baxımdan azərbaycanlıların keçirdikləri həyəcanı anlayır və dərdlərinə şərik çıxırlar. Həm İsrail, həm də Azərbaycan xalqları böyük faciələr yaşamışlar. Biz azərbaycanlı qardaşlarımızın bu ağrısını yaxşı anlayırıq və hər zaman Azərbaycanın yanındayıq.
Afula şəhərinin vitse meri doktor Boris Yudis çıxış edərək, Xocalı soyqırımına həsr olunan fotosərginin keçirilməsində "İsrail-Azərbaycan" Beynəlxalq Təşkilatının rolunu yüksək qiymətləndirmişdir. Bildirmişdir ki, "AZİZ" İsraildə fəaliyyət göstərən diaspor təşkilatları arasında ən fəalıdır.
Fotosərgidə həmyerlimiz Tofiq Əlibəyov çıxış edərək Dağlıq Qarabağda erməni faşistləri tərəfindən qətlə yetirilən oğlu haqqında danışmışdır.
"İsrail-Azərbaycan" Beynəlxalq Təşkilatının icraçı direktoru Lev Spivak bildirmişdir ki, sivil dünyanın gözü qarşısında Ermənistan tərəfindən törədilən bu soyqırımı hər yerdə kəskin pislənilməli, düşmən işğalı altında olan Azərbaycan əraziləri azad edilməli və azərbaycanlı qaçqın və məcburi köçkünlərin öz evlərinə qayıtmasına imkan yaradılmalıdır.
Afula şəhərində Xocalı soyqırımına həsr olunmuş fotosərgi aprelin sonunadək davam edəcəkdir.
Bölmənin digər xəbərləri
