SİYASƏT
XOCALI SOYQIRIMI İSTANBULDA YAD OLUNMUŞDUR
Türkiyənin İstanbul şəhərindəki mədəniyyət mərkəzində XX əsrin ən dəhşətli faciəsi - Xocalı soyqırımının onuncu ildönümü ilə əlaqədar tədbir keçirilmişdir.
Azərbaycanın İstanbuldakı baş konsulu Xeyrəddin Qoca çıxış edərək ermənilərin xalqımıza qarşı apardığı soyqırımı siyasəti, analoqu olmayan qəddarlıqları və vəhşilikləri barədə söhbət açmışdır. O, Prezident Heydər Əliyevin Xocalı soyqırımının onuncu ildönümü ilə əlaqədar Azərbaycan xalqına müraciətindən də geniş bəhs etmişdir.
Mərmərə Universitetinin professorları Necdət Öztürk, Süleyman Bəyoğlu, Qəzetçilər və Yazarlar Vəqfinin rəhbəri Harun Tokak, “Şaman yolu” televiziyasının baş müdiri Hidayət Qaraca, Azərbaycan Təhsil nazirliyinin Türkiyədəki müşaviri Nəcibə Nəsibova və başqaları tədbirdə çıxış edərək Xocalı soyqırımı haqqında Türkiyədə aparılan tədqiqatlardan, bu qanlı faciənin dünya ictimaiyyətinə çatdırılması istiqamətində görülən işlərdən söz açmış, Azərbaycan xalqına başsağlığı vermişlər.
Tədbirdə iştirak edən Azərbaycan Milli Məclisinin deputatı Əli Əlirzayev əsrin əvvəllərindən bəri ermənilərin həyata keçirdiyi işğalçılıq siyasətindən danışmışdır.
Sonra Xocalı soyqırımından bəhs edən film göstərilmiş, şerlər söylənilmişdir.