Xocalı soyqırımı Latviya Seymində müzakirə edilib
Riqa, 11 fevral, AZƏRTAC
Azərbaycan-Latviya parlamentlərarası münasibətləri yaxşı səviyyədədir, iki ölkənin parlamentləri daim qarşılıqlı əlaqə saxlayır.
Bu fikir fevralın 11-də Azərbaycanın Latviyadakı səfiri Elman Zeynalovun Latviya Seymində Azərbaycan-Latviya Parlamentlərarası Dostluq Qrupunun rəhbəri Xosam Abu Meri ilə görüşündə səslənib. Görüşdə səfirliyin əməkdaşları və parlamentlərarası qrupun üzvləri iştirak ediblər.
Azərbaycan-Latviya Parlamentlərarası Dostluq Qrupunun rəhbəri Xosam Abu Meri Azərbaycan səfirini salamlayaraq Latviya ilə Azərbaycan arasında ikitərəfli əlaqələrin uğurla inkişaf etdiyini vurğulayıb. X.A.Meri deyib ki, 2014-cü il dekabrın 17-də yaradılmış Parlamentlərarası Dostluq Qrupunda bütün fraksiyalar təmsil olunub. Hazırda 26 deputatın daxil olduğu bu qrup Latviya Seyminin ən böyük qrupudur. Latviyalı deputatların bu dostluq qrupuna daxil olmaq barədə müraciətləri hələ də davam edir. X.A.Meri qarşılıqlı səfərlərin bütün istiqamətlərdə ikitərəfli münasibətlərin fəal inkişafına şərait yaratmasını qeyd edərək, parlamentlərarası qrupun üzvlərinin Azərbaycana səfər etmək arzusunda olduqlarını bildirib.
Parlamentlərarası qrupun sədrinin müavini Roman Naudinş Azərbaycanla regionlararası əlaqələrin səmərəli və dinamik inkişaf etməsindən söhbət açıb. Azərbaycanın və Latviyanın yerli və regional hakimiyyət orqanları arasında əməkdaşlığın daha da möhkəmlənəcəyinə ümid etdiyini bildirən R.Naudinş Riqa yaxınlığındakı Latqal qəsəbəsi, Riqa şəhərinin Mərkəzi rayonu və Bakı şəhərinin Suraxanı Rayonu İcra Hakimiyyəti arasında regional əməkdaşlıq sahəsində müsbət təcrübə toplandığını qeyd edib. Azərbaycan Respublikasının Siyəzən Rayonu İcra Hakimiyyəti ilə Latviyanın Valmiyer bələdiyyəsi arasında əməkdaşlıq haqqında saziş imzalanıb.
R.Naudinş müsahibinin diqqətinə çatdırıb ki, bu yaxınlarda Azərbaycanda səfərdə olarkən Bakıda keçiriləcək birinci Avropa Oyunlarına yüksək səviyyədə hazırlıq getməsinin şahidi olub. O, əmin olduğunu bildirib ki, “Bakı-2015” Avropa Oyunlarının iştirakçıları möhtəşəm tədbirin şahidləri olacaqlar.
Görüşdə Latviya tərəfi iqtisadiyyat və təhsil sahəsində əlaqələri möhkəmlətmək, təhsil haqqında sənədlərin, attestatların və diplomların qarşılıqlı tanınması və ekvivalentliyi sahəsində normalar yaradılması arzusunu bildirib.
Səfir Elman Zeynalov Xosam Abu Merini Parlamentlərarası Qrupun rəhbəri təyin edilməsi münasibətilə təbrik edib. Qeyd olunub ki, Azərbaycan və Latviya parlamentləri arasında əlaqələr dövlətlərimizin və xalqlarımızın qarşılıqlı maraqlarının qorunmasına töhfə verir. Səfir Azərbaycanın davamlı iqtisadi inkişafı, iqtisadiyyatın müxtəlif sahələrində həyata keçirilən layihələr barədə məlumat verərək Ermənistan-Azərbaycan, Dağlıq Qarabağ münaqişəsinin tarixi məqamlarından da söhbət açıb. O qeyd edib ki, Azərbaycanın ədalətli mövqeyi bütün dünyada getdikcə daha çox tərəfdar tapır. Ermənistan isə siyasi cəhətdən təcrid olunmuş vəziyyətdədir və iqtisadi reqress dövrü keçirir.
E.Zeynalov Xocalı soyqırımı məsələsinə xüsusi diqqət yetirib. Azərbaycan səfiri bildirib ki, 1992-ci il fevralın 26-da yüzlərlə dinc sakinin qətlə yetirilməsi heç də təsadüfi deyildi. Bu, erməni millətçi dairələri tərəfindən əsrlər boyu yürüdülən soyqırımı və etnik təmizləmə siyasətinin tərkib hissəsi idi. E.Zeynalov diqqətə çatdırıb ki, Xocalı soyqırımı məsələsi bu gün böyük dövlətlərin parlamentlərində müzakirə edilir. O, latviyalı deputatları Xocalı faciəsi haqqında məsələni Latviya Seymində də səsləndirməyə çağırıb. Qeyd olunub ki, ABŞ-ın 15 ştatı və 11 ölkənin parlamenti Xocalı soyqırımını rəsmən tanıyıb.
Qrupun rəhbəri X.Abu Meri Dağlıq Qarabağ münaqişəsi haqda informasiyanı dinləyərək Latviyanın bu barədə mövqeyini bir daha diqqətə çatdırıb. Qeyd olunub ki, Latviyanın mövqeyi bu münaqişənin beynəlxalq hüququn norma və prinsipləri, dövlətlərin ərazi bütövlüyü əsasında dinc yolla tənzimlənməsindən ibarətdir. X.Abu Meri daha sonra bildirib ki, Xocalı soyqırımı məsələsi qrupun yaxın vaxtda keçiriləcək iclasında müzakirə olunacaq.
Görüşün sonunda Latviya-Azərbaycan Parlamentlərarası Dostluq Qrupunun üzvlərinə Azərbaycan haqqında və Xocalı soyqırımı haqqında kitabçalar paylanıb.
Nigar Cəfərli
AZƏRTAC-ın xüsusi müxbiri
Riqa
Bölmənin digər xəbərləri
