Xocalıda şəhid olmuş polis əməkdaşlarının və soyqırımı qurbanlarının xatirəsi anılıb
Bakı, 24 fevral, AZƏRTAC
Fevralın 24-də Daxili İşlər Nazirliyində (DİN) Xocalıda şəhid olmuş polis əməkdaşlarının ailə üzvlərinin iştirakı ilə anım mərasimi keçirilib.
DİN-in mətbuat xidmətindən AZƏRTAC-a bildiriblər ki, tədbiri açan daxili işlər nazirinin müavini, polis general-leytenantı Oruc Zalov öz tarixinin müxtəlif mərhələlərində erməni millətçiləri tərəfindən soyqırımına məruz qalan Azərbaycan xalqının növbəti belə faciə ilə 23 il əvvəl Xocalıda üzləşdiyini deyib.
Nazir müavini vurğulayıb ki, bu qanlı hadisəyə yalnız ulu öndər Heydər Əliyev hakimiyyətə qayıtdıqdan sonra obyektiv hüquqi-siyasi qiymət verilib, Milli Məclisin 1994-cü il 24 fevral tarixli qərarı ilə 26 fevral “Xocalı soyqırımı günü” elan olunub. 1997-ci il fevralın 25-də isə “Xocalı soyqırımı qurbanlarının xatirəsinə sükut dəqiqəsi elan edilməsi haqqında” Prezident Fərmanı imzalanıb.
Mərasimdə Xocalının müdafiəsi zamanı düşmənlə qeyri-bərabər döyüşlərdə qəhrəmancasına həlak olmuş 17 polis əməkdaşının, eləcə də soyqırımına məruz qalmış xocalılıların, Azərbaycanın ərazi bütövlüyü və suverenliyi uğurunda canlarından keçən soydaşlarımızın əziz xatirəsi bir dəqiqəlik sükutla yad edilib.
Xocalı soyqırımının insanlığa qarşı törədilmiş ən dəhşətli cinayətlərdən biri olduğunu bildirən Oruc Zalov qeyd edib ki, işğaldan sonra bütün maddi-mədəniyyət abidələrinin vəhşicəsinə dağıdılması bəşər sivilizasiyasına, insan haqlarına qarşı yönəlmiş vandalizm aktıdır. Aradan 23 il keçməsinə baxmayaraq, min bir işgəncə ilə qətlə yetirilmiş soydaşlarımızın, şəhid olmuş qəhrəman oğul və qızlarımızın əziz xatirəsi bu gündə ehtiramla anılır. Dünya ictimaiyyətinin Xocalı soyqırımı ilə bağlı məlumatlandırılması davam edir, tərəqqipərvər insanlar bu dəhşətli cinayəti törətmiş şəxsləri və onların havadarlarını lənətləyirlər.
Prezident İlham Əliyevin təşəbbüsü ilə bu faciənin bütün dünyada tanınması istiqamətində görülən işləri, Heydər Əliyev Fondunun Azərbaycan həqiqətlərinin dünyanın hər yerində yayılmasına yönəlmiş tədbirləri, eləcə də bir çox ölkələrdə yaşayan həmvətənlərimizin bu məsələdə həmrəyliyini diqqətə çatdıran Oruc Zalov vurğulayıb ki, artıq yalan və saxtakarlıq üzərində qurulmuş erməni təbliğatının iç üzü ifşa olunur. Dünya ictimai fikri Xocalı faciəsini soyqırımı kimi qəbul etməyə başlayır.
O.Zalov respublikanın daxili işlər naziri, general-polkovnik Ramil Usubovun adından qəhrəman şəhərin müdafiəsi zamanı şəhid olmuş polis əməkdaşlarının ailə üzvlərinə bir daha başsağlığı verib, onların problemləri və qayğıları ilə maraqlanıb, qaldırılan məsələlərin tezliklə həlli istiqamətində müvafiq tədbirlərin görüləcəyini bildirib.
Şəhid ailələri adından çıxış edən Tacirə Xəlilova, Şamilə Məmmədova və Vərziyar Əliyeva onlara göstərilən diqqət, qayğıya görə dövlətimizin başçısına və DİN rəhbərliyinə minnətdarlıqlarını ifadə ediblər.
Nazir müavini bu gün Azərbaycanın bölgədə həlledici söz sahibinə çevrildiyini, dünyada gedən mühüm proseslərlə bağlı öz prinsipial mövqeyini ortaya qoyduğunu, iqtisadi potensialımızın, siyasi və hərbi qüdrətimizin durmadan artdığını, ordumuzun hər an Ali Baş Komandanın əmrini yerinə yetirməyə hazır olduğunu xatırladıb, Azərbaycanın ərazi bütövlüyünü istənilən yolla bərpa edəcəyi barədə dövlətimizin başçısının qətiyyətli mövqeyini bir daha diqqətə çatdırıb.
Bölmənin digər xəbərləri
