İQTİSADİYYAT
XORVATİYANIN DÖVLƏT NEFT ŞİRKƏTİ ARDNŞ-LƏ ƏMƏKDAŞLIĞA HAZIRDIR
Xorvatiyanın Dövlət Neft Şirkəti (İNA) Azərbaycan Respublikasının Dövlət Neft Şirkəti (ARDNŞ) ilə sıx əməkdaşlığa hazırdır. Bunu AZƏRTAC-ın müxbirinə İNA-nın ölkəmizdəki rəsmi nümayəndəsi, “ATTAC PR” şirkətinin başçısı Fatimə Q.Aslan bildirmişdir.
O qeyd etmişdir ki, quruda yeni neft yatağının işlənilməsi haqqında İNA nümayəndələri ilə ARDNŞ rəhbərliyi arasında saziş imzalanmışdır və indiki mərhələdə mütəxəssislər həmin yer barədə geoloji məlumatlar toplayırlar. F.Aslan demişdir: “Yatağın seysmik, geoloji və lay xüsusiyyətlərinin analizi işləri başa çatmaqdadır. Növbəti mərhələdə işlərə bilavasitə yataqda başlamaq nəzərdə tutulur”.
Xorvatiya şirkəti 1968-ci ildən Suriyada, Misirdə, Anqolada, Rusiyada və Albaniyada aktiv işləyərək, dünya neft-qaz bazarında fəaliyyət göstərir.